پوليس: د ننگرهار پوهنتون د ژبو او ادبياتو رئيس وژل شوی
۱۳۹۸ شهریور ۵, سهشنبه
د سه شنبې په ورځ مازیګر شاوخوا څلور نیمې بجې د ننګرهار ولایت په مرکز جلال اباد ښار کې د یوې چاودنې له امله د ننګرهار پوهنتون د ژبو او ادبیاتو پوهنځي رئیس پوهاند مسعود نیکبخت وژل شوی، زوی یې او دوه نور استادان ژوبل دي.
د ننګرهار د پولیسو ویاند مبارز اتل ويلي دي چې پېښه د جلال اباد ښار په اومه ناحيه کې شوې ده. ویل شوي دي چې نښلېدونکی ماین د استاد نیکبخت په کرولا ډوله موټر پسې نښلول شوی وو.
مبارز اتل وويل چې په دغه پېښه کې د استاد نیکبخت زوی او د هندي څانګې استاد او دوه نور استادان ژوبل دي.
د ننګرهار د والي ویاند عطاالله خوږیاڼی وايي، د پوهاند نیکبخت پر موټر هغه مهال نښلېدونکي ماین چاودنه کړې، چې له پوهنتونه د کور پر لور روان وو.
د ننګرهار د عامې روغتیا ریاست ویاند ظاهر عادل وايي، له دغې پېښې د جلال اباد حوزوي روغتون ته د پوهاند نیکبخت جسد او درې ټپيان ور وړل شوي دي، چې د ټپیانو روغتیايي حالت ښه دی.
تر اوسه د دې پېښې مسئولیت کومې وسله والې ډلې نه دی منلي.
پوهاند مسعود نیکبخت کلونه د ننګرهار پوهنتون د عربي څانګې استاد وو او په وروستیو کلونو کې بیا د ژبو او ادبیاتو پوهنځي مسئولیت ور تر غاړه وو.
هغه د پخواني جهادي شخصیت مولوي محمد یونس خالص وراره وو.
اميد ديدار