په پاکستان کې ټولټاکنې؛ چاودنې او ډزو پنځه کسان وژلي
۱۴۰۲ بهمن ۱۹, پنجشنبه
رويټرز خبري آژانس د سيمې د پوليسو د يو مشر په حواله خبر ورکړی دی چې په ډېره اسماعيل خان کې د پوليسو پر موټر د بمي بريد او ډزو په ترڅ کې څلور تنه پوليس وژل شوي دي.
د چارواکو په حواله يو بل پوليس په ټانک سيمه کې هغه وخت وژل شوی دی چې پر موټر یې ډزې وشوې.
په همدې حال کې د بلوچستان له بېلا بېلو سيمو څخه هم د لاسي بمونو د بريدونو خبرونه ورکړل شوي دي چې د چارواکو په حواله تلفات نه لري.
د چهار شنبې په ورځ په بلوچستان کې د نوماندانو دفترونو ته څیرمه په دوو چاودنو کې لږ تر لږه ۲۶ کسان وژل شوي ول. د «اسلامي دولت» يا داعش ډلې د دې بريدونو پړه منلې وه. دې چاودنې په خلکو د نورو بريدونو په اړه ډېره انديښنه پارولې ده.
د پاکستان د پارلمان له پاره ټاکنې چې په ترڅ کې یې څه نا څه ۱۳۰ میليونه د رایې اچونې حق لرونکي، د خپلې رایې کارولو ته را بلل شوي دي، کلک امنيتي تدابير نيول شوي دي. د مسلم ليګ (ن) ګوند مشر او پخوانی لومړی وزير محمد نواز شريف، مخکښ کانديد بلل کیږي.
آ./ب.ص./ا.ا.