يو امريکايي عسکر په افغانستان کي وژل سوی دی

د قاطع ملاتړ ماموريت له خوا د جمعې په ورځ (د ۲۰۱۹ کال د اګست ۳۰مه) خبر ورکول سو چي په افغانستان کي د امريکايي پوځ يو عسکر وژل سوی دی. د يادي اعلاميې له مخي دغه امريکايي عسکر د پنجشنبې په ورځ وژل سوی.

د پنجشنبې په ورځ د امريکايي عسکر د وژل کېدنې سره په روان مېلادي کال په افغانستان کي د وژل سوو امريکايي عسکرو شمېر ۱۵ ته جګ سوی دی.

په جنګ ځپلي افغانستان کي دمګړی شاوخوا ۱۳۰۰۰ امريکايي عسکر مستقر دي. د امريکا د متحده ايالاتو ولسمشر دونالد ترمپ د پنجشنبې په ورځ ويلي ول چي د طالبانو سره ممکنه سولې د تړون وروسته به هم په افغانستان کي ۸۶۰۰ امریکايي عسکر مستقر پاته سي.

د امريکا متحده ايالاتو چي ۱۸ کاله تر مخه يې افغانستان ته خپل عسکر ولېږل، دمګړی يې په قطر کي د وسله والو طالبانو د استازو سره د ممکنه سولې په هکله خبري اتري ادامه لري.

AFPD / A.A.