هرات: د کرونا ناروغۍ د درملنې ۳۰۰ بستریز روغتون پرانیستل شو
۱۳۹۹ فروردین ۱۶, شنبه
د هرات ولایت د صحت عامې ریاست مسئولین وایي چې د دغه مرکز د جوړیدو لګښت او ځمکه یې د یوه ملي سوداګر له خوا ورکړل شوې ده.
د هرات ولایت د صحت عامې رئیس داکتر عبدالحکیم تمنا وایي:
»د کوید-۱۹ د ناروغانو له پاره د دې روغتون له پرانیستنې سره به، پر دې ناورغۍ د اخته کسانو د درملنې په برخه کې د ځای د کمښت ستونزه تر ډیرې اندازې پوري حل شي.«
نوموړي زیاته کړه چې دغه روغتون له خپلو ټولو تجهیزاتو سره د هرات ولایت د صحت عامې ریاست په اختیار کې ورکړل شوی دی.
د نوموړي په وینا د دې روغتون ټول پرسونل د صحت عامې د ادارې له خوا استخدام شوی دی، تر څو د کرونا پر نوي ویروس د اخته کسانو د درملنې په برخه کې روغتیایي خدمات وړاندې کړي.
دا په داسې حال کې ده چې مخکې تر دې د کرونا ویروس د ناروغانو د درملنې له پاره په هرات کې د روغتیایي پرسونل کمښت یوه لویه ننګونه ګڼل کیدله. په همدې حال کې د هرات ولایتي چارواکي وایي چې د کوید-۱۹ د ناروغانو د درملنې له پاره د یوه سل بستریز روغتون د جوړیدو چارې هم د بشپړیدو په حال کې دي. د دې روغتون د جوړیدو چارې هم ۸۰ سلنه بشپړې شوي دي.
د هرات د والي مرستیال داکتر محمد داود هاشمي وایي:
»د هرات صحت عامې ریاست د ۱۰۰۰ بسترونو امادګي لري، چې اوسمهال ۶۰۰ بستره یي د کوید-۱۹ ناروغانو د درملنې له پاره اماده شوي دي. «
په همدې حال کې هراتیان د کرونا ویروس پر وړاندې د مبارزې په برخه کې د تجارانو له مرستې څخه خوشحالي څرګندوي. خو یو شمیر یې بیا د کرونا پر ویروس د اخته کسانو د درمنلې په مرکزونو کې د روغتیایي پرسونل له کمښت څخه شکایت کوي.
هرات د کرونا ویروس له ګواښ سره مخامخ دی. د افغانستان ولسمشر محمد اشرف غني له کرونا ویروس سره د مبارزې له پاره ۴۰۰ میلیونه افغانۍ د هرات ولایت ته اختصاص کړي دي.
په اوس وخت کې په هرات ولایت کې د کرونا ویروس ۲۰۴ مثبتې پيښې ثبت شوي دي چې له دې ډلې ۴ تنو یي خپل ژوند له لاسه ورکړی دی او پنځه نور یي بیا له دغې ناروغۍ څخه رغیدلي دي.
اټکل کیږي چې له ایران څخه هرات ته د مهاجرو د ستنیدنې له هجوم سره به په ځانګړي توګه په دغه ولایت کې د کرونا پر ویروس د اخته کسانو شمیر هم لوړ شي.
پر ورته موضوع يو انځوريز البوم: