سبا په اسلام آباد کې د افغانستان په اړه کنفرانس جوړیږي

اسوشتید پریس له اسلام آباده د پاکستان د یو لوړپوړې ديپلومات له قوله لیکي چې په دغه کنفرانس کې به د اسلامي همکارۍ سازمان د ۵۷ غړو ګڼ شمیر خارجه وزیران ګډون وکړي.

منبع وايي چې په سباني کنفرانس کې افغانستان سره د مرستو د لارو چارو پر موندلو او د طالبانو پر سخت سیاست خبرې کیږي.

د پاکستان خارجه وزیر شاه محمود قریشي وویل چې د (او آی سي) کنفرانس یو تعامل دی او دا د طالبانو رژيم په رسمیت پيژندل نه دي.

قريشي زیاته کړه چې د يکشنبې ورځې غونډې پيغام دا دی: «لطفا افغانستان [يوازې] مه پریږدئ. لطفا تعامل وکړئ. موږ د افغانستان د خلکو په اړه خبرې کوو. موږ د يوې خاص ډلې سره خبرې نه کوو. موږ د افغانستان د خلکو په اړه خبرې کوو.»

د پاکستان خارجه وزیر وويل چې د امریکا متحده ایالاتو، چین، روسيې او اروپايي ټولنې په ګډون ستر قدرتونه به دغه یو ورځني کنفرانس ته د افغانستان له پاره خپل ځانګړي استازي واستوي. د افغانستان د طالبانو سرپرست خارجه وزير امیر خان متقي به هم په دغه کنفرانس کې ګډون کوي. رپوټونه وايي چې متقي اسلام آباد ته رسیدلی دی.

متقي تیره اوونۍ اسوشتید پریس ته وویل چې د افغانستان نوی حاکمان په افغانستان کې د نجونو زدکړو او د ښځو کار کولو ته ژمن دي.

پاکستان په داسې حال کې د افغانستان له پاره د دغه کنفرانس کوربه توب کوي چې په اګست کې د طالبانو اعلان شوی حکومت تر اوسه په رسمیت نه دی پيژندل شوی او دغه هیواد له سختو اقتصادي او بشري مرستو سره مخ دی. د طالبانو حکومت د څلورو میاشتو په تیرېدو سره، لا هم د افغانستان په اکثرو ولایتونو کې نجونې اجازه نه لري چې لیسو ته ولاړې شي او د ښځو کار هم تقریباْ د روغتيا په سکتور کې خلاصه کیږي. پاتې نورې ښځينه کارکوونکې په کورونو کينول شوي دي.

د پاکستان خارجه وزیر افغانستان ته د مرستو غوښتونکی دی. هغه خبرداری ورکوي که افغانستان له مرستو پرته او يوازې پريښودل شي، د القاعده په څير تروریستي ډلې بیا شکل ښايي ونیسي.

په واشنګټن کې د ویلسن مرکز د آسيا پروګرام مرستیال، مايکل کوګيلمن وايي د اسلامي همکارۍ هیوادونه کولی شي د ديني عالمانو له لارې ډير کار وکړي او طالبانو ته مستقیم وړاندیزونه وکړي. خو هغه په عین وخت کې وویل چې په حاضر وخت کې د لويديځ له پاره سخته ده چې له طالبانو سره تعامل وکړي او که چېرته تعامل هم کوي نو دا ډول تعامل به په شل کلنې جګړه کې پر ماتې باندې د اعتراف کولو په معنی وي.

آ/م.ک.ص./م.ن.ص.