سویدن د کورنيو له پاره تر ټولو ښه شرايط لري

د ملگرو ملتونو د کوچنیانو څخه د ملاتړ ادارې د پلټنو له مخې، تر سویدن وروسته په ترتیب سره ناروې، آیسلند، ایستلند او پرتگال هغه هېوادونه دي چې د کورنيو له پاره پکښې د ژوند شرايط ښه دي. آلمان په دغه فهرست کې شپږم ځای خپل کړی. د نوموړي فهرست د پای هیوادونه سویس، یونان، قبرس، بریتانیا او آیرلند ښوول سوي دي.

د یونیسف اجراییه مدیره، هینریتا فوره خبرداری ورکوي چې » موږ داسې حکومتونو ته اړتیا لرو چې د والدینو سره مرسته وکړي تر څو داسې یوه فضا رامنځته کړي چې پکښې د کوچنيو ماشومانو ښه پالنه وسي.« د یونسف د ادارې له پاره تر ټولو مهمه خبره داده چې د ماشوم د زیږیدو پر وخت، والدین حد اقل شپږ میاشتې د رخصتۍ حق ولري او له زیږیدو څخه د مکتب ته تر داخلیدو پورې ورته د دې زمينه برابروي چې خپل ماشومانو داسې ښو او عمومي وړکتونونو ته واستوي چې د فیس ورکولو ترعُهدې یې هم وتلای سي.

 کارپوهان خپلې پلټنې د ۲۰۱۶ کال، د کورنیو په وړاندې د ښه سیاست، له هغو ارقامو سره پرتله کوي چې په ۴۱ شتمنو هیوادونو کې تر سره سوي وې. د هغه وخت په گتگوري کې د رخصتي وخت، بشپړ معاش او د پلار د رخصتیو د میاشتو ونډه هم په پام کی نیول سوې وه. علاوه پر دې کارپوهانو، له هغو نجونو او هلکانو له پاره چې لا درې کلن شوي نه وي، له درو څخه تر شپږو کلونو پورې ساتنې او پالنې امکانات هم ارزولي دي.

د رخصتۍ اخیستلو یو پر دریمه برخه د پلرونو له پاره

د رپوټ له مخې په سویدن کې دغه رخصتي ۳۵ اونۍ ده چې په دې موده کې پوره معاش هم ورکول کيږي. له دې رخصتۍ څخه يو یوولس اونۍ پلرونو ته ځانگړې سوي او شاوخوا د نیمایي کوچنیانو له پاره چې عمرونه یې له درو کلونو کم دي، په وړکتونو کې ځای پیدا سوی. له درو څخه تر شپږو کلونو پورې د ماشومانو ۹۷ سلنه په وړکتون یا نورو تاسیساتو کې د پالنې امکانات تر لاسه کړي.

په رپوت کې راغلي چې په آلمان کې والدین څه د پاسه ۴۳ اونۍ د رخصت اخیستو حق لري. د پلرونو ونډه پکښي ۵،۷ اوونۍ ده. شاوخوا یو پر دریمه هغه کوچنیان چې له درو کلونو کم عمر لري، په منظم ډول وړکتونو ته د تلو امکانات ورپه برخه سوي. له درو څخه تر شپږ کلنو کوچنیانو ۹۲ سلنه کودکستانو ته ځي. د رپوټ په حواله ایستلند بیا مېندو ته تر ټولو اوږده رخصتي یعني، ۸۵ اوونۍ  له بشپړ معاش سره ورکوي. په هنگري کې په ترتیب سره دغه رخصتي ۷۲ او بلغاریا کې ۶۱ اوونۍ  ده. د امریکا متحده ایالات بیا په دغه ارزونه کی یوازینی هیواد دی چې پکښې د والدینو د رخصتۍ له پاره، هیڅ ډول ملي قوانین په پام کې نه دي نیول سوې.

G.P/B.S آژانسونه