زيلنسکي: د روسیې غوښتنې اوس «واقع بينانه» بريښي
۱۴۰۰ اسفند ۲۵, چهارشنبه
پر اوکراين د روسیې د بريد اوس کابو درې اونۍ اوړي او اوس هم په يو شمير ښارونو کې جګړه روانه ده. د چهار شنبې په سهار په ډېرو ښارونو کې د احتمالي بمبارۍ څخه د خلکو د خبرولو په موخه د خطر زنګ وغږول شو.
بل لوري ته پلازمينه کيف هم د هوايي بريدونو هدف دی او په ښار کې پر ګرځيدو بندیز دی. د تېرې ورځې په هوايي بريدونو کې لږ تر لږه ۵ کسان وژل شوي ول. اوکرايني چارواکو ويلي چې د سه شنبې په ورځ د هېواد په دويم ستر ښار خارکيف کې ځواکونو د روسي عسکرو د پرمختګ مخه نيولی ده.
د ملګرو ملتونو په حواله د فيبرورۍ پر ۲۴مه نېټه د جګړې له پېل راهيسې تر اوسه هر ورځ کابو ۷۰ زره ماشومانو کډوال کيږي.
د سولې په خبرو کې پرمختګ
د روسيې د بهرنيو چارو وزير سرګې لاوروف ويلي دي چې له اوکراين سره د توافق ځيني فورمول بندۍ نهايي کيدو ته نزدې شوي دي. د روسیې له آر بي سي نيوز سره د خبرو پر وخت لاوروف وويل که څه هم چې له اوکراين سره د سولې مذاکرات آسان نه ول خو يوه جوړجاړي ته د رسیدو تمه شته ده.
نوموړي وويل: «ماته زموږ د مذاکراتي ډلې د ارزونو له لارې لارښوونه کيږي. دوی وايي چې دغه مذاکرات د ځینو څرګندونو دلايلو پر اساس آسان نه دي. خو سره له دې هم يوه جوړ جاړي ته د رسېدو هیله شته.»
هغه وويل چې لانجمن ټکي يې يوازې د اوکراين د بې پرېتوب مسئله نه ده، بلکې په هېواد کې د روسي ژبې استعمال او هغه څه دي چې نوموړي د بيان د آزادۍ مسئله وبلله.
د سه شنبې په ورځ د اوکراين ولسمشر ولاديمير زيلنسکي هم د اوکراين او روسیې د استازو ترمنځ د سولې د مذاکراتو د څلورم پړاو په ترڅ کې د ځینو پرمختګونو څخه خبره وکړه. نوموړي وويل چې خبرې اترې اوس د مخکې په پرتله «ډېرې واقع بينانه» ښکاري.
د مهاجرو يو مرکز د روسیې په توغنديو لګېدلی
د چاروکو په حواله د اوکراين جنوبي ښار زاپروږا چې د محاصره شوي ښار ماريوپل څخه د تښتيدلو په زرونه کسانو له پاره يو پټنځای ګرځيدلی دی، د چهارشنبې په ورځ د روسي ځواکونو د توغنديو ښکار شوی دی.
د سيمې ښاروال اليکساندر شتاروک د تليګرام له لارې ليکلي: «په زاپروږا کې په لومړي ځل ملکي هدفونه په نخښه شوي دي.» خو نوموړي زياته کړې ده چې دې بريدونو تلفات نه درلودل.
زاپروږا د ماريوپل ښار په شمال لوېدیځ کې د کابو ۲۳۰ کیلومترو په واټن کې پروت دی. د مرستندويانو په حواله ماريوپل ښار چې خلک یې اوبو، برېښنا او خوراکي توکو ته لاس رسی نه لري، له يوه بشري بحران سره مخ دی.
خو روسیه د ملکي اهدافو په نخښه کول ردوي.
زيلنسکي به د امریکا کانګرس ته وينا وکړي
د اوکراين ولسمشر ولاديمير زيلنسکي به نن، چهار شنبه (۲۰۲۲م کال د مارچ مياشتې ۱۶مه نېټه) د امريکا کانګرس ته د ويديو له لارې وينا وکړي. نوموړي څه موده مخکې هم د امريکا کانګرس ته وينا کړې او دا به یې په يوه لنډه موده دويمه وينا وي.
د معلوماتو په حواله به د امريکا متحده ايالاتو ولسمشر جو بايدن د زيلنسکي تر وينا وروسته له اوکراين سره د نورو ۸۰۰ ميليونو امريکايي ډالرو د مرستې اعلان هم وکړي.
بل لوري ته د آلمان صدراعظم اولاف شولڅ ويلي دي چې هیڅوک هم د ناټو او روسیې د مستقيم مخامخيدو غوښتونکي نه دي. هغه وويل چې پر روسيې لګيدلی بندیزونو لا تر مخه مسکو ته دومره زيان رسولی دی چې کريملن یې تصور هم نه وو کړی.
د ناټو د دفاع وزيرانو ځانګړې غونډه
د ناټو د غړيو هيوادونو د دفاع وزيران د چهار شنبې په ورځ په بروکسل کې سره راټول شوي څو د اوکراين او روسیې د کړکېچ په اړه د يوې بيړنۍ ناستې په ترڅ کې خبرې اترې وکړي.
د ديپلوماتيکو سرچينو په حواله د ناټو قلمرو ته د دې جګړې له خوا متوجې ګواښونو ته په کتو سره به د روسیې د پرمختګ د مخنيوي له پاره پر ممکنه انتخابونو خبرې وشي. په نظر کې په نيول شوي اقداماتو کې د اروپا په ختيځ کې د دافع هوا توغنديو او سيسټمونو ځای پر ځای کول شامل دي.
په پام کې ده چې د اوکراين د دفاع وزير به د ويډيو کنفرانس له لارې په دې غونډه کې ګډون وکړي.
اوکراين د يوه بل روسي جنرال د وژل کيدو خبر ورکړی
د اوکراين حکومت د روسیې د پوځ د څلورم لوړپوړي افسر د وژل کيدو خبر ورکړی دی. د اوکراين د کورنيو چارو وزارت مشاور انتون ګيراشينکو ويلي دي چې روسی جنرال اوليګ متيايف د سې شنبې په ورځ د ماريوپل په شا او خوا کې د نښتو په ترڅ کې وژل شوی دی.
ګيراشينکو زياته کړې ده چې متيايف ۴۶ کلن وو او يو پوځي قوماندان وو چې د سوریې په جګړه کې هم ښکيل وو.
ب. ص/ ن. ز (AFP, AP, dpa, Reuters)