د روسیې پر خامو تېلو د اروپايي اتحادیې بندیز عملي شوی
۱۴۰۱ آذر ۱۴, دوشنبه
دا کار د اروپايي اتحادیې شاوخوا دوه پر دریمه برخه د روسیې د تیلو پر پخوانیو وارداتو اغیزه کوي. د پایپ لاینونو له لارې د وارداتو لپاره لاهم استثنا شتون لري، ځکه چې د اروپايي اتحادیې ځینې هیوادونه په دوی باندې خورا تکیه کوي.
همدارنګه له دوشنبې راهيسې او »تر دې وروسته ډېر ژر« به یو لړ مقررات پلي شي چې هدف یې د روسیې دې ته اړ کول دي، چې په نورو هیوادونو کې پیرودونکو ته يو بيرل تېل (۱۵۹ ليتره) په ۶۰ ډالر وپلوري.
روسیه نه غواړي چې د اروپايي اتحادیې او د جي ۷ صنعتي هیوادونو له خوا د تېلو د بيې ټاکل شوی حد ومني او ګواښ یې کړی چې د مخنیوي اقدامات به یې وکړي. د روسیې د لومړي وزیر مرستیال الکساندر نوواک وویل چې «دا ډول مداخلې» یوازې د بازار د بې ثباتۍ او د انرژي سرچینو د کمښت لامل ګرځي. دوی په داسي میکانیزم کار کوي، چې په هره کچه د »بيې د حد د ټاکلو مخه ونیسي.« خو نوواک نور جزیات ورنه کړل.
ملګري ملتونه د نورو داخلي بې ځایه شویو وړاندوينه کوي
په اوکراین کې د روانې جګړې له امله، د ملګرو ملتونو د کډوالو اداره (يو ان ايچ سي آر) اټکل کوي چې ډير شمیر خلک د دي پرځای چې اروپایی اتحادیې هیوادونو ته وتښتي، په هیواد کې دننه به بي ځايه شي. د کډوالو په چارو کې د ملګرو ملتونو عالي کمېشنر فیلیپو ګرانډي له شپيگل مجلي سره په یوه مرکه کې وویل: «تر ټولو احتمالي سناریو په اوکراین کې د نورو بې ځایه کېدو ده.» هغه زیاته کړه: «زه هیله لرم چې د مهاجرو بل لوی حرکت نه وي.» د يو ان ايچ سي آر مشر په ورته وخت کې وویل: «خو جگړه د وړاندويني وړ نه ده.«