د آلمان د عامې روغتيا وزير یو انځور ولې جنجالي شو؟
۱۳۹۹ فروردین ۲۹, جمعه
په کوچني ليفت کې د آلمان د عامې روغتيا له وزير سره د هسن ايالت لومړی وزير او يو شمیر نور لوړپوړي چارواکي چې ماسکونه يې هم تړلي دي، ليدل کيږي. له دوی سره څو تنه روغتيايي کارکونکي هم تر سترګو کیږي. دغه انځور د هسن ايالت د ګيسن پوهنتون په روغتون کې د يوه خبريال له خوا اخیستل شوی چې هغه بيا رسنيو ته ورکړی دی.
دغه انځور په ټولنيزو رسنيو کې ډير لاس په لاس شوي دي. د ټويټر ډيرو کارونکو يې په مقابل کې غبرګون ښکاره کړی او دا يې د چارواکو له خوا د قانون ماتول بللی دی. د آلمان پوليسو ويلي دي چې د ټاکل شوو مقرراتو نه رعايتول، د ټولو آلمانيانو له پاره يو ډول قانوني عواقب لري.
د پولیسو د يوه وياند په خبره د دغه انځور تر خپريدو وروسته، ډيرو خلکو دوی ته شکايتونه کړي او دغې موضوع ته د رسيدګۍ غوښتنه يې ورڅخه کړې ده. د هسن ايالت ویاند «فرانکفوتر الګماينه ورځپاڼې» ته ويلي دي: «دا د بحث وړ موضوع نه ده، خو نبايد داسې کار شوی وای.»
د آلمان د عامې روغتيا وزير خپله تيروتنه منلې ده. هغه پر خپل ټويټر ليکلي دي: «هو، دا سمه خبره ده چې د ماسک نه د استفاده سربيره، باید فاصله رعایت شي. بل ځل به ډير ساده له زينو څخه استفاده وکړم.»
اوس مهال په آلمان کې د کرونا ويروس د خپريدو د مخنيوي په موخه، لږ تر لږه د يونيم متر فاصلې رعايتول، اجباري ده. په هسن ايالت کې د دغې مقررې د نه رعایت له پاره تر پنځه زرو يورو پورې جريمه ټاکل شوې ده. وبه کتل شي چې آلمان له خپل وزير سره څه ډول چلن کوي.
له آرشيف څخه يو انځوريز البوم: