آلمان د ټولنيزو محدوديتونو پر احتمالي لرې کولو غور کوي
۱۳۹۹ فروردین ۲۴, یکشنبه
په آلمان کې د مختلفو څانګو کارپوهانو یو دولس کسیز ټيم يوه داسې پيشنهادي طرحه چمتو کړی چې له مخې يې څنګه په آلمان کې د کرونا بحران پر ضد لګول شوی محدوديتونه کم کړل شي. دغه طرحه د آلمان د «نورراين ویستفالن» ايالت د لومړي وزير، آرمین لاشت، په وړانديز، چمتو شوې چې کيدای شي د سیاستوالو د پام وړ واقع شي.
د آلمان خبري آژانس او آلمانۍ ورځپاڼې «فرانکفورتر الګماينه» د شنبې ورځې په ماښام (د ۲۰۲۰م کال د اپريل ۱۱مه) د دغې طرحې خلاصه چې څلور برخي دي، خپره کړې ده.
کارپوهان په دې باور دي چې په لومړي سر کې بايد دا روښانه شي چې د کوويد-۱۹ ناروغۍ د ابتلا خطر په کوم ځای کې ډير او کوم ځای کې لږ دی. دا هم بايد مشخص شي چې پر نوی کرونا ويروس باندې مبتلا کیدل د کومو کسانو له پاره ډير خطرناک دی. دوه نورې برخې يې د ټولنې او اقتصاد په اړه او په مختلفو برخو کې د لګول شوو محدودیتونه د مثبتو پايلو ارزونې تشکيلوي.
کارپوهان د ژر خوشبينۍ څخه خبرداری ورکوي او په دې باور دي چې آلمان بايد د کرونا نوي ويروس پر خپريدا د بشپړ کنترول درلودولو څخه د مخه، په دې پوه شي چې له دغه بحران سره به يې سر او کار پاتې وي.
د آلمان د کارپوهانو په دغه دولس کسيز ټيم کې يو شمير يې دغه کسان دي: د بُن ښار اوسيدونکی او ويروس پيژندونکی هندريک شتريک، د آلمان د اساسي قانون د محکمې پخوانی قاضي اودو دي فابريو او په کلن ښار کې د آلمان د اقتصاد د انستيتوت رئيس مشائيل هوتر.
د آلمان خبري آژانس او د فرانګفورتر الګماينه ورځپاڼې ته په لاس ورغلو معلوماتو له مخې، دغه کارپوهان سپارښتنه کوي چې لګول شوي ټولنيز محدوديتونه به هغه وخت کم کړل شي چې د دې ډاډ حاصل شي چې روغتيايي سيستم نور تر ډير فشار لاندې نه دی او د بحران د «مونيتورينګ» له پاره بهتره لارې چارې چمتو شوي دي.
د آلمان مرکزي حکومت د کرونا ناروغۍ پر ضد د مبارزې له پاره د محدود کونکو تدابيرو په اړه تر دې مخکې له ايالتي حکومتونو سره توافق ته رسيدلی دی او په پام کې دی چې د راتلونکې چهارشنبې په ورځ (د اپريل ۱۵مه) د کار د ادامې په اړه بحثونه وکني.
تمه ده چې صدراعظمه انګلا مرکل به د اپريل په ۱۹مه د ايالتي لومړي وزيرانو سره د ټيلفوني کنفرانس پر مهال، د يو لړ احتمالی محدوديتونو د لغوې يا تغيير په اړه خبرې وکړي.
د کارپوهانو دولس کسيز ټيم په دې بارو دی چې له بحران څخه د وتلو يوه احتمالي لار کیدای شي په تدريجي توګه په مختلفو برخو کې پر ټولنيز فعاليتونو د لګول شوو محدوديتونو لرې کول وي چې په دې کې ښونځي، روزنيز مرکزونه او کاروبار هم راځي.
د دغو کارپوهانو یوه بله سپارښتنه، د کوويد-۱۹ ناروغۍ د تشخيص له پاره د زيربنايي اسانتياو برابرول دي تر څو د هغو کسانو دوامداره معاينات او آزموينې په کې ترسره شي چې د دغې ناروغۍ علايم په کې ليدل کيږي.
حاضر وخت، په آلمان کې د ورځې ۱۰۰ زره د کرونا ناروغۍ د تشخيص آزموينې ترسره کيږي، خو د پلان له مخې په پام کې ده چې دغه آزموينې په ورځ کې نيم ميليون ته پورته شي.
اکثره آلماني کارپوهان او سياستوال په دې باور دي چې د کرونا ويروس د خپريدو سره د مقابلې په لار کې تر اوسه د لګول شوو محدوديتونو رعايت کول ډير ګټور ثابت شوي، لکه له دوو څخه د ډيرو کسانو د يو ځای کېدل ممنوعيت، د فاصلې مرعاتول او داسې نور. دوی ټينګار کوي چې دغه وضعیت باید وساتل شي تر څو د ابتلا پيښې ډيرې نه شي.