ترمپ په موقت ډول د کانګرس د فعالیتونو ځنډولو ګواښ کړی

د کرونا نوي ویروس د خپریدو په دلیل د امریکا کانګرس چې د سنا او استازو له مجلسونو څخه جوړ دی په فزیکي ډول غونډو ته نه حاضریږي. ترمپ وایي چې له همدې امله د حکومت په لسګونو زره مدیریتي پوستونه چې د نوماندانو انتخابول یې د کانګرس تائید ته اړتیا لري همداسې پاتې دي.

ترمپ د دیموکرات ګوند استازي چې په پارلمان کې اکثریت لري په حکومتي دستګاه کې په دې برخه کې د بې توجهۍ او بی کفایتۍ مسئول بولي.

د شپيګل انلاین د رپوټ پر بنسټ د امریکا متحده ایالاتو ولسمشر دونالد ترمپ د چهارشنبې (د اپریل میاشتې ۱۵ نیټه)په ماښام د خبریالانو په موجودیت کې ګواښ وکړ چې له خپل قانوني واک څخه په استفادې کولی شي د امریکا د کانګرس فعالیتونه د یوې مودې له پاره وځنډوي.

ترمپ زیاته کړه چې د کرونا له کړکیچ سره د مقابلې له پاره اړتیا لري هر څومره ژر چې ممکن وي د لوړو پوستونو له پاره اشخاص انتخاب شي. د کانګرس د فعالیت د ځنډول کیدو په صورت کې د امریکا ولسمشر کولی شي د سنا او استازو مجلسونو له تائید پرته د خپلې خوښې کاندیدان وټاکي.

انتقاد کوونکي وایي چې ډیري دغه پوستونه د ۲۰۱۷م کال په جنورۍ کې سپينې ماڼۍ ته د ترمپ له ننوتلو راهیسې تر اوسه پورې نه دي تائید شوي او د اکثرو له پاره یې خو لا تر اوسه پورې کاندان هم نه دي وړاندیز شوي.

له همدې امله پر ترمپ تور لګول کیږي چې د پارلمان د استازو د یوې څنډې ته کولو له پاره د کرونا بحران پلمه کوي. د امریکایي رسنیو په حواله اساسي قانون د امریکا ولسمشر ته اجازه ورکوي چې د کړکیچ پر مهال د کانګرس فعالیتونه د یوې مشخصې مودې له پاره ؤ ځنډوي، خو تر اوسه پورې داسې کله نه دي پيښ شوي.

د امریکا د استازو مجلس غړي او سناتوران به لږ تر لږه د می میاشتې تر پیل پورې حضوري مجلس دایر نه کړي، خو کنګرې تر اوسه پورې په رسمي ډول خپل فعالیتونه نه دي ځنډولي او رخصتي یې نه ده اعلان کړې.

د کانګرس پر غړو د خیانت تور

ترمپ د کانګرس د غړو له خوا د حضوري غونډو نه دایرول او د مدیریتي پوستونو له پاره د وړاندیز شویو اشخاصو وضعیت ته رسیدګي نه کول په داسې یو وخت کې له مسئولیت څخه تیښته او خیانت وباله چې امریکا د کرونا ویروس د خپریدو له کړکیچ سره لاس او ګریوانه ده.

ویل کیږي په هغه صورت کې چې ترمپ په موقت ډول د کنګرې د ځنډولو امر ورکړي، د استازو د مجلس دیموکرات غړې به یې پر وړاندې شکایت وکړي.

ترمپ وایې چې د دا ډول یو اقدام په اړه تقریباً ډاډه دی او «وبه لیدل شي چې څوک په محکمه کې بریالی کیږي.«

ترمپ په سپينه ماڼۍ کې خبریالانو ته وویل چې د کووید-۱۹ ناورغۍ د خپریدو د مخنيوي په برخه کې د حکومت سخت ګیرانه تدابیر اغیزمن ثابت شوي دي او په ټولو ساحو کې د کرونا پر ویروس د نویو اخته کیدونکو کسانو شمیر مخ پر کمیدو دی.

په امریکا کې د کرونا پيښې

د جانز هوپکینز امریکایي پوهنتون له خوا د وړاندې شویو معلوماتو پر اساس د پنجشنبې ورځې تر سهاره پورې په امریکا متحده ایالاتو کې په کرونا ویروس د اخته کسانو شمیر ۶۳۹ زرو ته رسیدلی دی. همدارنګه ۳۰۹۵۲ کسانو د دې ناروغۍ له امله خپل ژوند له لاسه ورکړی دی.

په کرونا ویروس د اخته کسانو شمیر د نړۍ د بل هر هیواد په پرتله په امریکا کې لوړ دی. د دونالد ترمپ د څرګندونو پر اساس په اوس وخت کې په امریکا کې په ۴۸ مختلفو میتودونو د کرونا د تشخیصولو معاینات ترسره کیږي او تر ۳ میلیونه او ۳۰۰ زرو ډيرې معاینې ترسره شوي دي.

د پنجشنبې تر سهاره (د اپریل میاشتې ۱۶ نیټه)پورې د نړۍ په ۱۸۵ هیوادونو کې د کرونا ویروس تر ۲ میلیونه او ۶۴ زرو ډيرې مثبتې پيښې ثبت شوي دي او څه دپاسه ۱۳۷ زره کسانو د کووید-۱۹ ناروغۍ له امله خپل ژوند له لاسه ورکړی دی.

د کرونا پر موضوع له آرشیف څخه يو انځوريز البوم:

دویچه ویله: ش.ن/ ن.ز