آلمان له اسرائیل سره د اردن د لویدیځې غاړې د الحاق مخالف دی
۱۳۹۹ تیر ۸, یکشنبه
ټاکل شوې ده چې د سه شنبې په ورځ د هغه پریکړه لیک مسوده د آلمان پارلمان (بونډسټاک) ته د رای ګیرۍ له پاره وړاندې شي چې د دغه هیواد مسیحي دیموکرات او سوسیال دیموکرات اتحادي ګوندونو جوړه کړې ده.
د آلمان خبري اژانس په حواله په دې مسوده کې راغلي دي چې له اسرائیل سره د اردن رود د لویدیځې غاړې د فلسطيني سیمو الحاق او په دې سیمه کې د یهودي ښارګوټو پراخوال د«بین المللي قوانينو خلاف» عمل دی.
د آلمان حکومت په دې مسوده کې د اسرائیلو له حکومت څخه غوښتي دي چې په خپل تصمیم کې دې تجدید نظر وکړي، ځکه داسې یو اقدام به د منځني ختیځ او سیمې د سولې بهیر او ثبات له پاره ناوړه پایلې ولري.
تمه کیږي چې د اسرائیلو حکومت به د جولای میاشتې په لومړۍ نیټه له دغه هیواد سره د اردن رود د لویدیځې غاړې د شاوخوا ۳۰ سلنه برخې د یوځای کولو د طرحې لومړی عملي ګام پورته کړي.
دغه طرحه د «پیړۍ معاله» په نامه د امریکا متحده ایالاتو د ولسمشر دونالد ترمپ د طرحې پر بنسټ چمتو شوې ده.
بی له جزايي اقداماتو پریکړه لیک
د آلمان ائتلافي ګوندونه د اسرائیلو حکومت پر وړاندې د هر ډول جزايي اقداماتو مخالف دی.
د پریکړه لیک په مسوده کې راغلي دي چې د آلمان حکومت باید په اروپایي اتحادیه کې خپل متحدین په دې قانع کړي چې د یو اړخیزو بندیزونو او یا د اسرائیل د مجازات کولو په اړه ګواښونه به، د فلسطين او اسرائیل ترمنځ د سولې پر بهیر او تفاهم هیڅ ډول مثبت تاثیر ونه کړي.
آلمان د جولای پر لومړۍ نیټه د اروپایي اتحادیي د شورا او د ملګرو ملتونو د امنیت شورا مشري په غاړي اخلي. له همدې امله آلمان به له اسرائیلو سره د اشغالي سیمو د رسمي الحاق په اړه د بین المللي غبرګونونو په برخه کې مهم رول ولري.
زرغون ګوند د حکومت د پریکړه لیک له مسودې سره موافقه نه ده کړې او ټاکل شوې ده چې د چهارشنبې په ورځ به یو جلا پریکړه لیک پارلمان ته وړاندې کړي. دا چې زرغون ګوند دغه حکومتي مسوده ولې رد کړې، یو علت یي دا دی چې دوی د اسرائیلو ترڅنګ د یوه فلسطيني هیواد د رامنځته کیدو پر حل لارې تمرکز کړی دی.
زرغون ګوند ټینګار کوي چې باید دې ټکي ته اشاره وشي چې فلسطينیان د ۱۹۶۷ مو کلونو د سرحدي پولو په اساس د یوه هیواد غوښتونکي دي.
په دې کال په شپږ ورځنې جګړه کې اسرائیلي پوځ د ختیځ بیت المقدس (اورشلیم) او اردن رود لویدیځې غاړې تر خپل کنترول لاندې راوستلې.
د زرغون ګوند د بهرنی سیاست د چارو کارپوه امید نوري پور، وویل: د تاسف ځای دی چې د آلمان د حکومت د پریکړه لیک په مسوده کې د یوه فلسطيني هیواد سرحدونو ته لیوالتیا نه ده ښودلې.
دویچه ویله: ش.ن/ م. ق. ن