آلمان له افغانستانه د ځينو افغانانو د راايستلو بهیر چټکوي
۱۴۰۰ دی ۳, جمعه
په افغانستان کې د طالبانو له لوري له بشري حقونو څخه د سختو سرغړونو رپوټونو ته په کتو سره، د آلمان د بهرنیو چارو وزیري آنا لېنا بیربوک ویلي دي چې غواړي په ځانګړې توګه له افغانستانه د آسیب پذیره خلکو د راایستلو هڅې ګړندۍ کړي. بیربوک د پنجشنبې په ورځ په برلین کې وویل چې اوس هم شا او خوا ۱۵۰۰۰ کسان چې آلمان یې د منلو هوډ څرګند کړی په افغانستان کې دي.
د هغې په خبره په هدفمنه توګه د دغو کسانو سفر ممکنول، د آلمان د حکومت په لومړیتوبونو کې راځي.
بیربوک د نوو لارو د موندلو په لټه کې ده
د آلمان د بهرنیو چارو د وزیرې په خبره په افغانستان کې هره ورځ چې تيريږي په ځانګړې توګه د ښځو او نجونو له پاره مهمه ده.
بیربوک زیاته کړې چې د آلمان د بهرنیو چارو وزارت د افغانستان له پاره د «عمل پلان» وړاندې کړی چې پر نورو سربیره پکې د افغانستان د مدني ټولنې له فعالانو سره نزدې همکاري په پام کې نیول شوې ده، څو په دې ترتیب د هغو کسانو چې خوندیتوب ته اړتیا لري له افغانستانه د رایستلو بهیر ګړندی کړای شي.
هغې د ویزې د اجرا په برخه کې د ځینو بیوروکراتیکو خنډونو د له منځه وړلو یادونه کړې. د بیربوک په خبره د کورنیو د الحاق چاره هم باید آسانه کړی شي.
پر دې سربیره بیربوک د افغانستان له ګاونډیو هیوادونو سره د نوو مذاکراتو د هڅې خبر ورکړ، څو د سفر کولو نورې لاري رامنځ ته شي. آلمان تر اوسه له افغانستان څخه د افرادو د راايستلو ماموریت په ترڅ کې هغه کسان چې خوندیتوب ته اړتیا لري د قطر او پاکستان له لارې راایستل.
۱۳۵ آلمانان لا هم په افغانستان کې دي
د اګست میاشتې په نیمایي کې واک ته د طالبانو تر رسیدو وروسته د آلمان د حکومت په مرسته ۱۰۰۰۰ کسان له دغه هیواده راایستل شوي دي چې په دغه ډله کې ۵۳۰۰ کسان د پوځي تخليې ماموریت په ترڅ کې راایستل شوي دي.
د آلمان د بهرنیو چارو وزارت د معلوماتو له مخې ۱۳۵ آلمانان اوس هم په افغانستان کې دي. زیاته شوې ده چې هغوی «د انفرادي شرایطو له کبله هم» لا تر اوسه سفر نه دی کړی.
د بیربوک د معلوماتو له مخې د بشري مرستو له پاره ۶۰۰ میلیونه یورو ځانګړي شوي دي. د هغې په خبره اوس باید یوازې دا خبره یقني کړای شي چې دغه پېسې د طالبانو لاسونو ته نه لویږي، بلکې د یخنۍ او لوږې پر وړاندې د مبارزې په برخه کې ولګول شي، نو له دې کبله به د ملګرو ملتونو او غیر دولتي سازمانونو سره په دې برخه کې همکاري وشي. زیاته شوې ده چې په راتلونکي کال کې به هم له افغانانو سره بشري مرستې ادامه ومومي.