Чавушоглу: Некои НАТО-земји сакаат долга војна во Украина

Шефот на турската дипломатија Мевлут Чавушоглу денеска (20.04) упати обвинувања на сметка на некои држави членки на НАТО дека сакаат војната во Украина да трае долго, за да се ослабне Русија.

„Има земји во НАТО кои сакаат војната да продолжи. Тие сакаат Русија да ослабне“, рече Чавушоглу во интервју за Си-Ен-Ен Турк, притоа не наведувајќи на кои држави мисли.

Турција од почетокот на војната прави обиди за посредување помеѓу Москва и Киев. Русија и Украина двапати водеа разговори во Турцијаза прекин на огнот. Последните разговори се одржаа на крајот од март. Во меѓувреме разговорите се во ќорсокак.

Шефот на руската дипломатија Сергеј Лавров во телефонски разговор со Чавушоглу денеска рекол оти исходот од разговорите со Украина зависи целосно од подготвеноста на Киев да ги земе предвид барањата на Русија.

Портпаролот на Кремљ, Дмитри Песков, денеска изјави дека Украинците „се повлекуваат од она со што веќе се согласија“. Песков тврди дека на Киев му се испратени конкретни предлози за завршување на војната.

- повеќе: Се бара прекин на огнот во Украина за Велигден

Украинскиот претседател Володимир Зеленски, пак, тоа го демантира и вели дека досега не добил руски предлози за ставање крај на војната. „Ништо не сум слушнал, ништо не сум видел. Уверен сум дека ништо не ни предале“, рече Зеленски.