Тачи: Србија заостанува во остварување на договорот

Кабинетот на Хашим Тачи пренесе дека косовскиот премиер рекол оти Владата на Косово во преговорите со Србија за нормализирање на односите „покажала целосна волја и подготвеност за остварување на договорот од 19. април минатата година и сите секторски договори кои ги постигнале двете земји“.

Тачи оценил дека се постигнати конкретни резултати во остварување на договорот, но оти „има застој од страна на Србија во остварување на договорот“, и изразил верување дека, со поддршка на ЕУ и на САД, тој застој ќе се надмине, со придонес кон стабилизирање на односите меѓу Косово и Србија.

Тачи високата претставничка на САД ја известил за парламентарните избори од 8. јуни, и оценил дека тие покажале оти „Косово успешно поминало уште еден тест на демократија, организирајќи фер, слободни и демократски избори на целата територија“.

„Сега со најголеми институционални и политички определби работиме на имплементација на изборните резултати, почитувајќи ја волјата на граѓаните, Уставот и законите на Косово и веруваме дека целиот политички спектар на Косово ќе покаже висока сериозност и политичка зрелост“, рече Тачи.

Косовскиот премиер ја информираше Викторија Нуланд и за определбата на Владата на Косово за спроведување реформи чијашто цел е одржлив економски развој, пред се’ во областа на енергетиката и туризмот.