Стотици уапсени на новиот масовен протест во Минск

Над 100.000 демонстранти маршираа во неделата на улиците во Минск, барајќи од претседателот на Белорусија Александар Лукашенко да поднесе оставка, со што протестите влегоа во шестата недела. Според податоците на Министерството за внатрешни работи, над 400 лица се задржани во притвор.

Министерството наведува дека протестите се одржани во 16 града, вклучувајќи го и Брест каде полицијата употреби водени топови против неколку илјади демонстранти. Голем број демонстранти, кои според проценката на групата за човекови права „Вјасна“, биле преку 150.000, носеле транспаренти критички настроени против Русија, а агенцијата Асошиејтед прес оценува дека тоа покажува загриженост поради денешниот состанок на Лукашенко со рускиот претседател Владимир Путин.

Тоа ќе биде нивна прва средба во четири очи по избивањето на немирите во Белорусија по претседателските избори на 9 август кои, според тврдењата на демонстрантите и опозицијата, биле наместени.

Повеќе:

-На опозицијата во Белорусија и треба план

-Марија Колесникова: Со насмевка против Лукашенко

-Белорусија: Како функционира пропагандата на Лукашенко?

„Извор на власта во Белорусија е народот, а не Лукашенко и Кремљ“, пишуваше на еден транспарент кој го носеа демонстраните во Минск. „Кажете ми кои ви се пријатели и ќе ви кажам кој сте“, пишуваше на друг транспарент на кој се наоѓаа фотографии на Лукашенко и Путин.

Полицијата постави редови бодликава жица и возила за транспорт на затвореници, а распореди и повеќе илјади војници да го блокираат центарот на градот за да ги запрат демонстрантите, но тие се собраа надвор од центарот и маршираа кон резиденцијата на претседателот на периферијата од градот.

Претседателите на Русија и Белорусија, Владимир Путин и Александар Лукашенко, ќе се сретнат денеска во Сочи. Според официјалните најави  од Кремљ тие ќе разговараат за дополнителна интеграција меѓу двете земји и за спроведување заеднички енергетски проекти.