Расмусен повикува на воздржаност на Косово
15 септември 2011
Генералниот секретар на НАТО Андерс Фог Расмусен, денеска во Приштина повика на продолжување на дијалогот меѓу Белград и Приштина. На прес-конференција по средбата со косовскиот премиер Хашим Тачи, Расмусен ги повика сите лидери да се воздржат од еднострани дејства и да дадат свој придонес за побезбедна иднина.
Тој го поздрави дијалогот меѓу Белград и Приштина и досега постигнатите резултати, додавајќи дека успехот на овој процес е од решавачко значење за иднината на Косово и целиот регион.
„Никој нема да има полза од враќањето на насилството од минатото. За жал, ова лето видовме колку брзо може да се зголеми тензијата. Инцидентите се лоши за Косово и се јасен удар врз постигнатиот напредок“, истакна Расмусен.
Во врска со мисијата на НАТО, КФОР, тој нагласи дека нејзиниот мандат е да обезбеди мирна и безбедна животна средина, што значи дека КФОР треба да дејствува доколку биде во опасност оваа околина.
„Дел од мандатот на КФОР е исто така да им обезбеди слобода на движењето на граѓаните и на силите на мисијата, доколку тоа е неопходно“, истакна Расмусен.
Автор: ЕМФ/миа
Редактор: А. Трајковска