1. Прескокни до содржината
  2. Прескокни до главната навигација
  3. Кон други страници на DW

Навални ја доби наградата Сахаров на Европскиот парламент

БГ /АП
20 октомври 2021

Затворениот руски опозициски лидер Алексеј Навални ја доби наградата за човекови права на Европскиот парламент, во директнa порака кон претседателот Владимир Путин за неговиот однос кон опозиционерот.

https://p.dw.com/p/41wBD
Russland Moskau | Gefängnis | Alexei Navalny
Алексеј Навални снимен во затвор во МоскваФотографија: Moscow's Preobrazhensky District Court/dpa/picture alliance

При доделувањето на наградата Сахаров на Алексеј Навални, Европскиот парламент ја апострофираше неговата „голема лична храброст“. 45-годишниот активист беше отруен со нервен агент минатата година, а потоа и уапсен по враќањето во Москва од третманот во Германија.
„Тој водеше постојана кампања против корупцијата на режимот на Владимир Путин, а преку неговите профили на социјалните мрежи и политичките кампањи, Навални помогна да се откријат злоупотребите и да се мобилизира поддршката на милиони ширум Русија. За ова, тој беше отруен и фрлен во затвор“, соопшти претседателот на ЕП Давид Сасоли. Тој повика и на итно ослободување на Навални. 

Наградата за навални дополнително ќе ги наруши односите на ЕУ со Русија. Тие и онака се во надолна линија повеќе години, особено по анексијата на украинскиот полуостров Крим од Русија и сепаратистичкото востание во источна Украина. 

Russland Andrei Sakharov 1988
Наградата го носи името на советскиот дисидент и добитник на Нобеловата награда за мир Андреј СакаровФотографија: Gerard Fouet/AFP

Најблискиот соработник на Навални, Леонид Волков рече дека наградата покажува оти стотици парламентарци од различни земји и партии постигнале консензус дека борбата против корупцијата е главна задача за цела Европа и дека Навални е „политички затвореник број. 1 во светот и личен затвореник на Путин“. 
„Европа разбира дека ние се бориме за од Русија да направиме нормална европска држава, која што тоа и ќе стане, и таа го поддржува тоа“, напиша тој на Фејсбук. 

Наградата вредна 50.000 евра ќе биде презентирана на 15 декември на седница на Европскиот парламент во Стразбур. Останатите кандидати беа група авганистански жени, затворен боливиски политичар и поранешната привремена претседателка Жанин Ањез. 

Наградата на ЕУ, именувана по советскиот дисидент Андреј Сахаров, беше востановена во 1988 година во чест на поединци и групи кои ги бранат човековите права и основните слободи. Нобеловиот лауреат за мир Сахаров почина во 1989 година.  

Прескокни го блокот Повеќе на оваа тема

Повеќе на оваа тема