Путин: „Не сакаме поделба на Украина“

Договорот за присоединување на Крим кон Русија беше потпишан во Кремљ од страна на рускиот претседател Владимир Путин, кримскиот премиер Сергеј Аксјонов и претседателот на кримскиот парламент Владимир Константинов. Путин во обраќањето до нацијата по потпишувањето на договорот истакна дека референдумот на Крим е исправање на историска неправда.

На церемонијата во Кремљ присуствуваа претставници на двата дома на рускиот Парламент. За присоединувањето на Крим кон Руската Федерација одобрение треба да дадат двата дома на рускиот Парламент, преку ратификација на договорот, како и рускиот Уставен суд. Парламентарците по потпишувањето на договорот на денешната церемонија аплаудираа и честитаа за отцепувањето на Крим. Овие чекори за стапување во сила на договорот се сметаат за формалност.

Рускиот претседател Путин го обвини Западот за поттикнување немири во Украина со цел да се прекинат историските врски на земјата со Русија. Путин смета дека Западот направил заговор за земање на Украина во својата сфера на влијание. Тој ги отфрли критиките на Западот дека референдумот на Крим е нелегален. Според Путин, гласањето на Крим во неделата е во согласност со меѓународното право и го одразува правото на самоопределување. Како пример за тоа тој ја посочи независноста на Косово од Србија, која беше поддржана од Западот, а на која се противеше Русија.

Во говорот во парламентот Путин рече и дека правата на етничките Руси биле нарушени од страна на новата украинска влада. Путин изјави дека неговата нација не сака да навлезе во други региони во Украина, додавајќи: „Ние не сакаме поделба на Украина“.

Во однос на испратената војска, Путин рече дека тоа било направено во согласност со договор со Украина, кој и’ дозволува на Русија да има до 25.000 трупи во базата во Крим на Црното Море.