Поплави во Бразил: попуштија две брани
27 декември 2021
Околу 60 места во бразилската сојузна држава Бахиа, според зборовите на нејзиниот гувернер, вчера се нашле под вода. Управата соопшти дека на викендот пукнале две брани, преку социјалните медиуми е упатен повик до населението во околината на браните да го напушти регионот и да се засолни. Луѓе се спасувани со помош на хеликоптери и чамци, напиша гувернерот на Бахиа, Руи Коста вчера на Твитер. „Во моментов приоритет е спасувањето животи“, твитна тој.
Со недели Бахиа страда од невремиња, кои доведоа до поплави и до лизгање на земјиштето. Бразилските медиуми, повикувајќи се на информации од Службата за цивилна заштита во Бахиа, јавуваат дека од ноември досега загинале 18 луѓе, а околу 20.000 останале без покрив над главата.
При попуштање на брана во бразилскиот град Брумадињо на почетокот на 2019 година најмалку 250 луѓе беа убиени од надојдената лавина кал.