Полицијата ги блокира протестите на граѓаните

Илјадници луѓе вечерва повторно излегоа на улиците на Скопје на протести против одлуката на претседателот на државата Ѓорге Иванов да помилува повеќе од 50 политичари и нивни соработници.



Иванов попладнето соопшти дека нема намера да ја повлече одлуката и покрај масовните демонстрации. Граѓаните бараат оставка од Иванов.



Како и претходните денови, протестите кои ги организира иницијативата #протестирам започнаа пред седиштето на Специјалното јавно обвинителство на кое му беше изразена поддршка.


Но обидот на илјадниците луѓе да го продолжат протестот пред Собранието беше спречен од големи полициски сили.


Обидот, протестот да продолжи пред зградата на Владата исто така беше блокиран. Полициски кордони поставени на Камениот мост и на булеварите околу владината зграда ги спречи во намерата.



Илјадници луѓе има и на плоштадот Македонија. Седиштето на ВМРО-ДПМНЕ е исто така опколено со кордони полиција на сите крстосници.

Во меѓувреме полицијата ја повлече блокадата пред зградата на владата и протестот на граѓаните сега е концентриран таму.

Во исто време, контра-демонстранти организирани од ГДОМ протестираа пред седиштето на СДСМ во Скопје. Движејќи се кон партиското седиште тие извикуваат „Никој не ти може ништо, Никола“.
Тие се незадоволни поради аболицијата за Зоран Заев и Зоран Верушевски од страна на Иванов. Протестот заврши мирно и без инциденти.