Поголема заштита за германските работници

Германската влада има намера да ги заштити подобро работниците во земјата од дампингот на плати и лошите услови за работа. По повеќемесечно натегање и полемики, Владата денеска предложи закон против злупотреба на т.н. позајмени работници.

Во претпријатијата веќе нема да има „двокласно општество“, уверена е министерката за труд Андреа Налес. Работниците кои се вработени директно во претпријатието веќе нема да имаат толкав притисок од досега поевтините, т.н. позајмени работници (работници кои се вработуваат во претпријатието преку фирма за посредување работна сила). „Мислам дека ќе имаме помалку експлоататорски договори за работа“, претпоставува Налес.

Предлог законот предвидува позајмените работници, односно работниците кои работат на одредено време, во иднина по девет месеци минати во претпријатието да добиваат иста плата како и матичните работници со исти работни задачи. Тие по 18 месеци работа во една фирма ќе мора да го променат статусот и од позајмени работници да станат матични работници во фирмата. Исклучоци се можни доколку страните во тарифните преговори се договорат за нешто, со кое на позајмените работници уште од почеток би им следувала подобра плата и редовни зголемувања на личниот доход.