Повредени и уапсени во протестите во Скопје

Околу две илјади демонстранти, како што пренесуваат македонските медиуми, пред зградата на Собранието се судрија со полицијата. Седум полицајци се повредени, а уапсени се 25 учесници на синоќешните протести пред Собранието, организирани против Договорот за решавање на спорот за името, што вчераутро беше потпишан во Преспа.

Министерството за внатрешни работи информира дека во текот на вчерашниот јавен протест во Скопје, пред зградата на Собранието, дел од демонстрантите употребиле распрскувачки средства и насилно ја турнале заштитната ограда, истовремено обидувајќи се насилно да влезат во Собранието. „Со цел да се спречи ескалирање на ситуацијата и насилен упад во Собранието, а постапувајќи согласно процедурите, полицијата употреби солзавец", велат од МВР. Министерството за внатрешни работи потенцира дека го почитува правото на мирен протест, но нема да дозволи употреба на сила и насилен упад, како и нарушување на јавниот ред и мир.

Демонстрантите, организирани преку социјалните мрежи, пред Собранието гласно го искажуваа незадоволството од постигнатиот договор за името со Грција. На историска церемонија вчера утрото во Преспа, министрите за надворешни работи на Македонија и на Грција потпишаа договор со кој се става крај на 27 години долгиот спор. Документот предвидува Македонија во иднина да го носи името Република Северна Македонија, а тој треба да биде одобрен во парламентите на двете земји.