Одзивот до 10 часот - 6,31 отсто, слично како во првиот круг

Одзивот на гласачите до 10 часот изнесува 6,31 отсто, од обработени податоци од 88,10 проценти од избирачките места, соопшти Државната изборна комисија (ДИК) на првата прес-конференција.  

За споредба, одзивот во првиот изборен круг до 10 часот изнесуваше 6,05 проценти од обработените податоци од 75,28 отсто од избирачките места, а финално 6,23 отсто од 100 отсто обработени податоци.

Најголема излезност до 10 часот имало во Крива Паланка (14,91%), Демир Капија (13,24%), Кратово (12,46%) и Берово (11,06).

Најмала излезност имало во Врaпчиште (1,16%), Дебар (1,29%) и Боговиње (1,31%).

Претпладнето во целата земја гласањето тече мирно. И според граѓанската асоцијација МОСТ, која го следи изборниот процес со најголем број набљудувачи - повеќе од 1.500, не се забележани неправилности во досегашното спроведување на гласањето.

Повеќе: Тече вториот круг на шестите избори за петтиот претседател

Вчера, своето право на глас веќе го искористија болни, немоќни, раселени, притворени и затворени лица. Од вкупно 1.640 запишани гласачи во казнено- поправните домови правото на глас го користиле 74,13%. Помал одзив од 46,16% покажале иселениците кои исто така гласаат в сабота. Од вкупно 1.781 регистрирани гласачи од дијаспората, гласале 724 лица. Според податоците кои ги објави ДИК, најголема излезност имало во Сараево со 78,57 проценти, Букурешт со 64,29 %, Брисел 63,27 %, Берлин 63,16%, додека најниска излезност има во Рим со 28 % и Абу Даби со 20 %. Во овие бројки не се вклучени податоците од САД и Канада, каде заради временската разлика, гласањето започна подоцна.