Од меѓународниот град на правдата- за правда во Македонија

Поддршка за Специјалното јавно обвинителство и за барањата на илјадниците граѓаните кои протестираат во Македонија, во саботата дојде од Хаг, Холандија.

Oд меѓународниот град на мирот и правдата- Хаг, македонските граѓани порачаа дека се загрижени за демократијата, слободата и владеењето на правото во Македонија.

„Огорчени од самоволието на режимот, но и охрабрени од масовната мобилизација на илјадниците граѓани кои ја започнаа Шарената револуција се собравме да изразиме целосна поддршка на отпорот и на сите барања на граѓанското движење #Протестирам и на Шарената револуција.“

Во писмото кое беше доставено во македонската амбасада во Холандија се наведуваат повеќе барања:

Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство.

Итна и неотповиклива оставка од претседателот Ѓорге Иванов од функцијата.

Произнесување на Уставниот суд за уставноста на СЈО.

Формирање на специјално одделение на Кривичниот суд кое ќе биде надлежно за случаите под јурисдикција на СЈО.

Итно повлекување на одлуката за одржување на парламентарни избори на 5 јуни.

Задолжнително вклучување и присуство на независни претставници на граѓанското општество во процесот на решавање на кризата.

Формирање на преодна влада која докрај ќе ги имплементира итните реформски приоритети од извештајот на Прибе.

Во Македонија деновиве немаше протести поради велигденските и првомајските празници. „Духот“ на Шарената револуција сепак се пренесуваше низ социјалните мрежи преку велигденските јајца.