Обид за атентат врз премиерот на Судан
Премиерот на Судан Абдала Хамдок денеска преживеа обид за атентат со бомба која експлодираше во главниот град Картум во близина на конвојот возила во која се наоѓаше и тој. Суданските државни медиуми јавија дека Хамдок бил на пат кон својот кабинет кога се случила експлозијата и оти тој не бил повреден и бил „однесен на безбедна локација“.
Сѐ уште никој нема преземено одговорност за нападот. На снимките објавени на интернет се гледаат три оштетени возила кои ги користат нависоките претставници на Судан. Хамдок стана премиер на земјата во август минатата година по продемократските протести кои ја принудија војската во април да го собори од власт автократскиот претседател Омар ал-Башир. Оттогаш, наваму, де факто владетели со Судан се воените генерали.
Повеќе:
-Договорена преодна влада за Судан
-Дали по пучот во Судан следи револуција?
Хамдок вети дека ќе соработува со Меѓународниот кривичен суд во судскиот процес против сторителите на воени злосторства и геноцид за време на граѓанската војна во суданскиот регион Дарфур, која траеше од 2003 до 2010 година.
Суданските власти исто така порачаа дека имаат намера на судот да му го испорачаат и поранешниот претседател Омар ал-Башир.
Речиси една година по соборувањето на Ал-Башир, Судан се наоѓа во тешка економска криза: инфлацијата изнесува неверојатно 60 проценти, а стапката на невработеност според податоците на Меѓународниот Монетарен Фонд е преку 22 насто.
Владата соопшти дека во Судан невработени се 30 насто од младите, кои сочинуваат повеќе од половина од вкупно 42 милиони жители на земјата.