Мексико: осомничените го признаа убиството на студентите

Тројца осомничени членови на криминалната организација „Гуерос Унидос“(„Guerreros Unidos"), уапсени неодамна, признаа убиство и палење на голема група луѓе, соопшти мексиканскиот генерален државен обвинител Хезус Муриљо Карам. Според исказите на уапсените мажи, полицајци, кои очигледно работеле за локалните нарко-катрели, ним им предале над 40 студенти.

Местото на злосторството се наоѓа во близина на градот Игуала, каде 43 студенти кон крајот на септември исчезнале по судирот со полицијата. Таму младите луѓе биле убиени, а нивните тела полиени со бензин и запалени. Убијците потоа ја собрале пепелта во пластични вреќи и ги фрлиле во реката, соопшти Муриљо. Истрагата навистина пронашла шест пластични кеси со човечки остатоци и пепел. Генералниот обвинител истакна дека идентификацијата на посмртните остатоци ќе биде тешка, поради што студентите и натаму се водат како исчезнати.

Корумпирани локални политичари и полицајци

Неразјаснетата судбина на младите луѓе со недели го окупира вниманието на мексиканската јавност. 43 левоориентирани студенти беа киднапирани на 26 септември во сојузната мексиканска држава Гуеро. Уште пред неколку недели членови на „Гуерерос Унидос“ признаа убиство на студентите и ги одвеле истражителите до масовен гроб, но таму закопаните трупови не биле оние на исчезнатите студенти.

Во вторникот поранешниот градоначалник на Игуала и неговата сопруга, кои беа во бегство шест недели, а се сметаа за налогодавачи на убиството, беа најдени и уапсени. Хозе Луис Абарка и неговата жена Мариа де Лос Ангелес Пинеда побегнаа по исчезнувањето на студентите и оттогаш се криеја. Главното обвинителство претпоставува дека Абарка наредил убиство на студентите за да спречи тие следниот ден со протести да го попречуваат говорот на неговата жена. Брачниот пар веројатно имал врски со нарко бандата „Гуерерос Унидос“, жената потекнува од семејство кое се занимава со трговија со дрога и одржува врски со картелот Белтран-Лејва. Таа наводно е водечки член на „Гуерерос Унидос“. Според проценката на истрагата, во регионот повеќе корумпирани политичари и полицајци тесно соработуваат со злосторниците.