Масовен егзодус од Косово кон Западна Европа

Само два месеца по преземањето на власта, владата во Приштина е разнишана од граѓански безредија, едни од најголемите од прогласувањето на независноста во 2008 година. Таа се соочува и со драматичен пораст на бројот на Косовци кои на илегален начин се обидуваат да емигрираат во Европската Унија.

Министерот за финансии Авдула Хоти најави дека владата размислување да ги отпише сите долгови на граѓаните направени кон државата до 31 декември 2008 година. „Сметаме дека е неопходно да овозможиме свеж почеток за новата влада“, вели тој. Владата ја одбрала 2008. бидејќи во февруари таа година беше прогласена сецесијата од Србија. Владата не соопштува колку ќе чини отпишувањето на долговите, но потегот би можел да предизвика загриженост кај косовските доверители - партнерите од Западна Европа и од Меѓународниот монетарен фонд. Неплаќањето на сметките е широко распространета пракса во Косово, земја која редовно се соочува и со недостиг од електрична енергија.

Годинава иселувањето уште поинтензивно

Сиромаштијата, невработеноста и корупцијата се главна мотивација за драматичниот пораст на бројката на косовски граѓани кои се обидуваат да заминат во западна Европа, а најчесто тоа го прават минувајќи ја границата меѓу Србија и Унгарија под закрила на ноќта.

Од септември минатата година повеќе од 30 илјади Косовци биле приведени од унгарските власти и аплицирале за азил. Набргу потоа, тие успеваат да ги напуштат азилантските центри и да се упатат кон Германија, Швајцарија и други земји каде бараат работа „на црно“.

Само во јануари годинава над 10 илјади Косовци побарале азил во Унгарија, иако немаат никаква можност да го добијат. Напливот се должи на релаксирањето на досегашните ограничувања во Србија за патување со косовски документи.

Виновни се шверцерите

Последниве денови, големи групи луѓе ги користат ноќните автобуски линии за да отпатуваат до Белград, а потоа до Суботица, од каде шверцерски групи нелегално ги пренесуваат преку унгарската граница. Освен олеснетото патување преку Србија, егзудосот се поклопува и со периодот на политички турбуленции и безредија во Косово.

Косовскиот министер за образование Азем Гури информираше за „алармантни“ податоци, според кои, 5.200 ученици го напуштиле училиштето и се иселиле со своите семејства од септември минатата година. Се проценува дека косовската дијаспора брои меѓу 700 и 800 илјади луѓе, мнозинството во Швајцарија и Германија.

Косовскиот министер за внатрешни работи Скендер Хисени деновиве се сретна со ЕУ амбасадорите во Приштина и апелираше да се забрзаат процедурите за одлучување по барањата за азил, за да се обесхрабрат потенцијалните мигранти. Вината за случувањата тој ја префрли врз шверцерите: „Тоа се криминалци кои профитираат од несреќата на косовските граѓани“.