Кери пристигна во Киев со една милијарда долари помош

Пристигнувањето на државниот секретар Џон Кери во Киев беше проследено со експресна најава од Вашингтон дека Украина ќе добие пакет- помош вреден околу една милијарда долари, наменет пред сѐ за енергетскиот сектор.

Помошта од САД опфаќа енергетска помош, тренинг за финансиските и изборните институции, и анти-корупциски мерки. Високи американски дипломати потврдија дека Вашингтон разгледува и различни можности за санкции против Москва. Веќе се суспендирани разговорите околу билатералната трговија, а Пентагон најави дека ја замрзнува воената соработка која опфаќаше заеднички вежби, билетарални средби и конференции со Москва.

ЕУ се заканува со санкции

Можноста за воведување санкции против Русија се разгледува и на ниво на ЕУ. Слично како и американските, и тие најверојатно ќе опфатат блокада на рускиот извоз на природен гас, ураниум и јаглед. Шефот на германската дипломатија Франк-Валтер Штајнмајер, кој синоќа телефонски разговарал со рускиот колега Сергеј Лавров, најави конкретни чекори, доколку Русија не покаже подготвеност за преговори.

Опишувајќи го разговорот со Лавров како „тежок, долг и сериозен“, Штајнмајер рече дека Москва има рок до утре вечер (05.03.2014) да ги објасни своите намери во Украина.

„Доколку не видиме одлучни чекори во следните ден и пол, во смисла на изнаоѓање меѓународен договор, на пример за формирање контакт-група со која Русија е подготвена да соработува, тогаш може да се очекува дека Европскиот совет ќе преземе мерки“.

Лидерите на ЕУ закажаа вонредна средба в четврток во Брисел, на која ќе се разговара за заедничкиот одговор на кризата во Украина.

„Руската страна е свесна за сериозноста на ситуацијата, и добив гаранции дека нема да се случи напад врз украинскиот територијален интегритет... Важно е да се истражат сите можности за да се спречи опасноста од насилство“, рече Штајнмајер.