Германија: После поплавите доаѓаат политичарите

Во поплавите кои го погодија крајбрежното подрачје на Северно море во февруари 1962 загинаа повеќе од 300 луѓе. Десетина илјади жители на Хамбург останаа без кров над глава. Тоа беше пресвртница во кариерата на идниот канцелар Хелмут Шмит, тогаш сенатор за внатрешни работи во Хамбург. Кризниот менаџмент и одлуката да се ангажира армијата во помошта за настраданите го направија познат во Германија.

„Вечниот канцелар“ беше при крајот на мандатот кога го посети Бранденбург во 1997 година, по катастрофалните поплави во регионот на истокот на Германија до реката Одра. Оваа ткн. „поплава на обединувањето“ се смета за прва национална криза која беше тест на солидарноста меѓу тукушто обединетата Источна и Западна Германија.

На Герхард Шредер му се насмевна среќата по големото невреме во Саксонија во летото 2002, кога поплави ги зафатија Германија, Австрија и Чешка. Кандидатот за канцелар на СПД, соочен со не многу успешна предизборна кампања, облече чизми и се претстави како кризен менаџер во поплавеното градче Грима. Еден месец подоцна победи на изборите.

За Едмунд Штојбер, тогаш кандидат за канцелар на ЦДУ/ЦСУ, посетата на политичкиот противник Герхард Шредер на поплавените подрачја беше како студен туш. Штојбер беше на одмор на северот на Германија кога се случи катастрофата. Во Саксонија стигна неколку дена подоцна и огорчено се жалеше на „поплава-туризмот“ на својот ривал.

Ангела Меркел неколку пати во текот на својот мандат посетуваше настрадани подрачја, а првпат во март и април 2006 во долината на реката Лаба во Саксонија. Катастрофата се случи само неколку месеци по ураганот Катрина во САД, кога Џорџ Буш беше критикуван поради лошиот кризен менаџмент. Меркел се погрижи тоа да не и се случи и на неа.

Источна и јужна Германија ја погодија екстремни поплави во летото 2013, неколку месеци пред изборите. Катастрофата се закануваше да го уништи историскиот центар на Дрезден откако се излеа реката Лаба. Поплавите тогаш погодија поголем дел од средна Европа. Меркел ги посети погодените региони во Саксонија и Баварија и вети помош.

Кандидатот за канцелар на ЦДУ/ЦСУ ги откажа сите планирани состаноци и замина во поплавениот Хаген. Овојпат политичкиот влог е голем, со оглед дека разорните поплави ги погодија гласачите во неговата матична Северна Рајна Вестфалија. Главен ривал на Лашет е партијата на Зелените, а неговата репутација на заштитник на индустријата на јаглен би можела да и наштети на неговата кампања.

Кандидатот за канцелар на СПД, Олаф Шолц ги посети тешко погодените места заедно со премиерката на Рајнланд Фалц и партиска колешка Малу Драјер. Иако според анкетите неговата партија заостанува зад ЦДУ, како актуелен министер за финансии, Шолц вети итна државна помош за погодените региони.

Канцеларката Ангела Меркел во неделата (18.07.2021) го посети селото Шулд во Ајфел. Го увери локалното население дека ќе им даде поддршка и веднаш најави нова посета. „Ќе останеме во контакт и ќе се вратам кон крајот на август“. Дали е тоа ветување во рамките на предизборната кампања? Не- Меркел не се кандидираше на парламентарните избори закажани за септември 2021.