Три децении по обединувањето, истокот заостанува зад западот

Триесет години по падот на Берлинскиот ѕид, источна Германија и натаму е за една петтина помалку продуктивна од западот, покажува ново истражување на Институтот за економски истражувања во Хале.

И покрај значителниот напредок од повторното обединување во 1990 година, и околу 2 трилиони (две илјади милијарди) евра инвестиции во истокот од страна на сојузната влада, регионапните разлики остануваат длабоки, открива новата студија.

Околу 93 проценти од 500-те најголеми фирми во Германија и натаму се базирани на западот на сојузната држава. Притоа, компаниите со слична големина на истокот се за околу 20 проценти помалку продуктивни од оние на западот.

Студијата сугерира дека субвенциите кои владата ги плаќала за да ги охрабри компаниите да ги сочуваат работните места, всушност, придонеле за намалена работна продуктивност.

„Политиката на субвенционирање имаше негативни последици“, вели Реинт Гроп, претседател на Институтот, дополнувајќи дека таквата пракса мора да се напушти.

Ниски плати и недостаток на обучен кадар

И платите на истокот остануваат пониски за околу 20 проценти од остатокот на Германија. Во источна Германија, со исклучок на Берлин, разликите во платите варираат од 68 проценти до Герлиц, кој се наоѓа на границата со Полска, до 95,5 отсто во Јена - вториот најголем град во покраината Тирингија.

Авторите на студијата предлагаат зајакнување на источните градови преку охрабрување на компаниите таму да ги префрлат седиштата на своите компании.

Нотирајќи го и недостатокот на обучена работна сила во источните покраини, студијата препорачува и другите градови, а не само главниот град Берлин, да прифатат повеќе обучени мигранти. Според авторите, подобрите животни и работни услови ќе привлечат талентирани работници, паралелно со нови инвестиции во образованието и науката.

Потребен сеопфатен пристап

Експертите сметаат дека политичарите треба да „се справуваат со проблемите во Германија како целина, и на тој начин и истокот ќе напредува“.

По падот на Железната завеса, комунистичка Источна Германија и Западна Германија повторно се обединија за првпат по Втората светска војна. Економијата на Западна Германија забележа огромен развој во 45 години по завршувањето на војната, но Истокот беше на работ на банкрот.

По обединувањето, на истокот на земјата беа инвестирани по околу 100 милијарди евра годишно во инфраструктурата и економијата.

Новата студија би можела повторно да ја отвори дебатата за иднината на солидарниот данок - давачка од 5,5 отсто со кој сите германски даночни обврзници го финансираа заздравувањето на истокот. Веќе со години тлеат незадоволството и дебатата по прашањето дали овој данок е и натаму потребен.