Без визи во 2009 во Европа?

Германскиот главен град Берлин е домаќин на европските експерти за безбедносна и одбрамбена политика. Тие расправаат за постигнатото и предизвиците на безбедноста, како и за значењето и сигурноста на границите. Конгресот го отвори вице-претседателот на Европската комисија Жак Баро, кој инаку е надлежен за правда, безбедност и слободи.

Честитки за постигнатото

"

Сакам да и’ честитам на Република Македонија или ФИРОМ, или незнам како да ја наречам, за постигнатиот прогрес. Има толку постигнато што може да се случи во 2009-та година да има либерализација на визите“ - порача Баро. Според него тоа не се однесува само на Македонија, туку и на другите земји од Балканот. Баро меѓутоа истакна дека либерализацијата сепак ќе зависи од исполувањето на поставените услови, како што е напредокот во борбата против организираниот криминал, против корупцијата, како и безбедноста на надворешните граници.

„Ова ќе се оценува за секоја земја одделно. Но, Македонија е најнапред отидена од земјите во регионот”, изјави Жак Баро на Конгерсот за европската безбедносна и одбрамбена политика, што се оддржува во Берлин.

Баро говореше за значењето, привилегиите и слободите кои ги дава Шенген-зоната и истакна дека од наредниот јуни, кога во биометрискиот пасош ќе се најдат и отпечатоци од прстите, ќе биде оневозможено, како го нарече, тргувањето со визи.

Во панел расправата на Конгресот учествуваат и претставници од македонското Собрание и Министерството за одбрана, кои пред европските експерти ќе пренесат зошто визните бариери треба да се отстранат. Македонија на овој план направи многу, вели пратеникот Александар Николовски, кој ја предводи македонската делегацијата. Тој ги појасни и петте исполнети критериуми, така што сега се’ зависи од политичката одлука на Европската комисија.

Табу тема - европски безбедносни интереси

На Конгресот експертите дискутираат за неопходноста од дефинирањето на вистинските европски безбедносни интереси, кои на политичко ниво, се’ уште се табу тема и потиснати од националните интереси.

"

Ова табу не е повеќе прифатливо. Во услови на глобализацијата и заканите за земјите, кои таа ги носи, концептот на чисти национални безбедносни интереси во Европа едноставно не е во духот со времето. Затоа е неопходно да се утврдат заедничките европски безбедносни интереси - констатираше и Карл фон Вог, претседавач со Конференцијата.