Нема меѓународна истрага за падот на авионот на Пригожин

Владата во Москва ја известила бразилската воздухопловна управа Ценипа дека „засега“ нема да покрене истрага за несреќата според меѓународни правила, соопшти за агенцијата Ројтерс бразилскиот Центар за истражување и превенција на воздухопловни несреќи.

Ценипа претходно соопшти дека во интерес на подобрување на безбедноста на летовите ќе учествува во истрага предводена од Русија, доколку биде поканета и доколку истрагата се спроведе според меѓународните правила. Паднатиот авион Embraer Legacy 600 е произведен во Бразил.

Според Меѓународната организација за цивилно воздухопловство на Обединетите нации (ИЦАО), со седиште во Монтреал, домашните летови, како што е летот на Евгениј Пригожин од Москва до Санкт Петербург, не подлежат на меѓународни прописи. Пригожин, двајца високи генерали од неговата група Вагнер и четворица телохранители биле меѓу десетте лица во авионот што минатата недела се урна северно од Москва. САД и другите западни влади се сомневаат дека владата во Москва стои зад падот на Embraer Legacy 600, кој важи за безбедно летало. Кремљ негира каква било вмешаност.

Пригожин погребан во Санкт Петербург

По нешто помалку од една недела по несреќата, Пригожин вчера (29.08) беше погребан во Санкт Петербург. „Збогувањето“ со Пригожин е направено во тесен круг, објави на Телеграм компанијата Конкорд, која тој ја основал. Портпаролот на Кремљ, Дмитри Песков, претходно изјави дека претседателот Путин нема да присуствува на погребот. Присуството на шефот на државата „не било планирано“, а Кремљ „нема прецизни информации“ за погребот, рече Песков.