Белорусија: Започнало стационирањето на руско атомско оружје

Претседателот на Белорусија, Александар Лукашенко изјави дека Русија почнала да распоредува тактичко нуклеарно оружје во неговата земја, со што се конкретизира најавата на претседателот Владимир Путин дадена во март за распоредувањето на ова оружје.

„Распоредувањето на атомското оружје веќе започна“, рече Лукашенко.

Вчера (25.05.2023) министрите за одбрана на Русија и на Белорусија, Сергеј Шојгу и Виктор Кренин потпишаа договор за официјализирање на процедурата за распоредување на руско нуклеарно оружје на белоруска територија, за што претходно се договорија лидерите на двете земји. 

Москва ќе има контрола над руското нуклеарно оружје на територијата на Белорусија.

Рускиот претседател Владимир Путин во март изјави дека Москва планира да распореди тактичко нуклеарно оружје со релативно краток дострел во Белорусија, со што набргу се согласи и Лукашенко.

Најавувајќи го почетокот на распоредувањето на нуклеарното оружје, Лукашенко изјави дека е во Москва и затоа не може да потврди дали ова оружје веќе пристигнало во Белорусија.

Руските власти се уште не реагирале на изјавата на Лукашенко.

Објавувањето на договорот предизвика незадоволство во западните земји, но и кај белоруската опозиционерка во егзил Светлана Тихановскаја.

Од друга страна, на фронтот во Украина започна повлекувањето на руската паравоена група Вагнер, која сака да ги отстапи своите позиции на руската регуларна армија во Бахмут. Вагнер пред неколку дена објави дека го зазел тој град во источна Украина.