Мнозинството Германци против затворање на нуклеарките
15 април 2023
Поголем дел од Германците не се согласуваат со денешното планирано затворање на преостанатите три нуклеарни централи во земјата. Повеќе од половината (59 проценти) одлуката на политиката ја сметаат за погрешна, а само една третина (34 проценти) за правилна, покажува најновото репрезентативно истражување на јавното мислење АРД-Дојчландтренд, спроведено од институтот Инфратест Димап, за Утринскиот магазин на германскиот јавен сервис.
Согласноста за прекин на работата на атомските централи преовладува единствено кај испитаниците во возрасната група од 18 до 34 години (59 со 39 проценти), додека кај средовечните и постарите луѓе превагнува негативен став.
Владиниот чекор различно се толкува и во рамките на политичкиот спектар: додека приврзаниците на Зелените го одобруваат со големо мнозинство (83 проценти), а оние на СПД нешто над половината (56 проценти), симпатизерите на партиите од Унијата (ЦДУ/ЦСУ) се на другата страна – 83 проценти се решително против, исто како и оние на АфД (81 процент), во мнозинство се против и приврзаниците на ФДП (65 проценти).
Денеска ќе бидат дефинитивно исклучени од погон трите преостанати атомски централи во Германија – Исар 2 во Баварија, Емсланд во Долна Саксонија и Некарвестхајм 2 во покраината Баден-Виртемберг.
Тоа беше предвидено всушност уште за крајот на минатата година, но поради руската инвазија врз Украина и енергетската криза предизвикана од неа, германската владина коалиција реши да го продолжи работниот век на трите нуклеарки уште преку зимата.
Енергијата од атомските централи постојано е предмет на општествени и политички дебати во земјата, во кои нејзините заговорници и огорчени противници посегнуваат по различни аргументи за нејзината оправданост и еколошките опасности кои ги носи. Дури и ден пред конечното затворање, Унијата повторно решително се спротивстави.
„Утре е лош ден, утре е црн ден за Германија“, изјави вчера претседателот на ЦДУ, Фридрих Мерц.
Германскиот министер за економија Роберт Хабек од Зелените меѓутоа нагласува дека Германија не треба да стравува за енергетската безбедност, таа ќе биде сигурна и по исклучувањето на последните три атомски централи, а во иднина акцентот се префрла на масивна изградба на обновливи енергии.