Штрајк во Луфтханза: Откажани стотици летови во Германија

Во раните утрински часови започна најавениот предупредувачки штрајк во Луфтханза, кој треба да трае 27 часа.  Копнениот персонал на германската авиокомпанија денеска штрајкува за да го зголеми притисокот во преговорите за зголемување на платите во рамките на новиот колективен договор.  Патниците во земјата со најсилна економија во Европа се сѐ пооптоварени поради бранот штрајкови, која започна во железничкиот а продолжи во јавниот и авионскиот сообраќај.

Штрајкот започна во четири часот наутро и ќе трае до четврток во седум часот наутро, соопшти националниот авиопревозник. Околу 100.000 патници ќе бидат погодени од оваа најнова индустриска акција.

Синдикатот Верди најави дека ќе штрајкува на аеродромите во Франкфурт, Минхен, Хамбург, Берлин и во Дизелдорф. Ќе има само 10 до 20 отсто од летовите во Франкфурт и во Минхен.

Во преговорите Верди бара зголемување на платите за 12,5 отсто за 25.000 работници или најмалку 500 евра повеќе месечно во период од 12 месеци, плус еднократна исплата од 3.000 евра за компензација на инфлацијата.

Синдикатот тврди дека повисоките трошоци за живот и големиот обем на работа поради недоволно персонал се основа за повисоки плати. Копнениот персонал на Луфтханза стапи во штрајк во јули 2022 година за време на последната рунда преговори за колективен договор, предизвикувајќи големи нарушувања во авионскиот сообраќај.

Оттогаш, најголемата европска економија е погодена од серија штрајкови низ целата земја, кои ги погодија воздушниот сообраќај, железничкиот и јавниот транспорт, а и сѐ повеќе расте незадоволство од коалициската влада на Германија на канцеларот Олаф Шолц.