Столтенберг го поздрави договорот меѓу Израел и Хамас
22 ноември 2023
Генералниот секретар на НАТО, Јенс Столтенберг, кој е на неформален состанок на лидери на НАТО во Скопје, го поздрави договорот меѓу Израел и Хамас за ослободување заложници.
„Го поздравувам договорот меѓу Хамас и Израел што треба да доведе до ослободување на заложниците и ќе овозможи доставување на хуманитарната помош“, порача Столтенберг.
Претходно и ЕУ го поздрави постигнатиот договор за ослободување на 50-те заложници и за пауза во непријателствата. „Секој ден во кој овие мајки и деца се држат како заложници од терористите е премногу. Ја споделувам радоста на семејствата кои наскоро ќе можат повторно да ги прегрнат своите најблиски“, се вели во пораката на претседателката на ЕК, Урсула фон дер Лајен.
Што предвидува договорот?
Израелската влада одобри прекин на огнот во војната против Хамас. Договорот предвидува милитантната исламистичка група да ослободи приближно 50 од околу 240 заложници што ги киднапираше во Појасот Газа за време на терористичкиот напад врз Израел на 7-ми октомври. Примирјето исто така овозможува хуманитарна помош за Појасот Газа.
Хамас го потврди ослободувањето на 50-те заложници во рамки на четиридневниот прекин на огнот и рече дека договорот за возврат предвидува ослободување на 150 палестински затвореници.