ОН: Отфрлена руската резолуција за биолошко оружје

За резолуцијата гласаа само постојаните членки на Советот за безбедност, Русија и Кина, а против беа Франција, САД и Велика Британија. Сите десет непостојани членки на СБ беа воздржани. Русија повика на „формирање на комисија составена од сите членови на Советот за безбедност“.

Заменик рускиот амбасадор во ОН, Дмитриј Пољанскиј, го критикуваше исходот од гласањето. Ова е израз на „вообичаениот колонијален менталитет“ на западните држави, оцени тој. Русија повторно ќе го отвори ова прашање на Конференцијата за проверка на Конвенцијата за забрана на биолошко оружје што ќе се одржи во Женева од 28 ноември до 16 декември.

САД и Украина уште минатата недела категорично ги отфрлија руските обвинувања за развој на биолошко оружје. Заменикот на Високиот претставник на ОН за прашања на разоружувањето, Адедеји Ебо, изјави дека Обединетите нации немале сознанија за програма за биолошко оружје во Украина и немаат ниту мандат ниту „технички капацитети“ за спроведување истрага.