Смртоносни шумски пожари во Португалија

Најмалку три лица загинаа, а 17 се повредени во шумските пожари кои беснеат во регионот Авеиро во Португалија, објавија португалските власти.

Пожарникар починал од срцев удар, а пронајдени се телата на двајца цивили, објави новинската агенција ЛИСА, повикувајќи се на агенцијата за цивилна заштита АНЕПЦ.

Еден од загинатите е 28-годишен вработен во шумарство кого пожарот го изненадил во шумата. Според извештаите, втората жртва, како и пожарникарот, починала од срцев удар додека се обидувала да го изгаси пожарот надвор од својот дом.

Најкритично во северна и во централна Португалија

Според властите, речиси 3.500 пожарникари, војници и припадници на цивилната заштита ги гаснат пожарите. Ситуацијата е најлоша на северот и во центарот на државата.

„Ситуацијата не е надвор од контрола, но е сложена“, рече шефот на АНЕПЦ, Андре Фернандеш. Тој додаде дека гаснењето на пожарот напредува добро со оглед на околностите.

Шпанија, Франција, Италија и Грција ќе испратат по два канадери откако Лисабон тоа го побара од Европскиот механизам за цивилна заштита.