„Sky“ апликацијата - омилена „играчка“ на криминалците

Најбезбедна апликација која лесно се „маскира“ на телефоните, тешко се пробива во неа, податоците се бришат веднаш по разговорот, со што исчезнуваат сите траги за тајните договори - ова се само некои од карактеристиките коишто апликацијата Sky изминатите години ја направија најинтересна алатка за криминалците. Нарко-босови, криминалци, полицијата, трговци со оружје, лица вклучени во ланецот со проституција ширум светот, според медиумските извештаи изминатите години ја користеле оваа апликација надевајќи се дека таа ќе им понуди тајност и безбедна комуникација. Но, во голем број случаи полицијата сепак им влезе во трага на енкриптираните пораки и разби бројни криминални планови. 

Не е единствена апликација, но е омилена за криминалците

Sky не е единствена апликација од овој тип, но важи за една од омилените на криминалците. На неа се одвивале разговорите и договарањата за криминалните активности во коишто била вмешана и групата од Грчец, која што македонската полиција тврди дека ја разбила во четвртокот(25.01). Детектирани се 16 припадници на групата, коишто полицијата ги поврзува со низа криминални активности во изминатите четири години - од трговија со кокаин, убиства и обиди за убиства. Седуммина се уапсени, од кои еден е пронајден во Шпанија, додека по другите се трага.  

„Криминалната група плановите и договорите за извршување на кривичните дела ги правела преку непосредни контакти или со користење енкриптирани телефони во кои била инсталирана апликацијата Sky“, соопшти на прес-конференција министерот за внатрешни работи Оливер Спасовски. 

Зошто токму „Sky“?

Апликацијата ја основал Жан-Франсоа Еап, како Sky ECC во Канада. Замислена е како комуникациска мрежа и давател на услуги. Таа се промовира како најбезбедната платформа за пораки што може се да се користи. Основачот бил толку уверен во својот производ што понудил награда од четири милиони долари на секој што би можел да ја пробие шифрирањето во рок од 90 дена. Цената на годишна лиценца за користење на апликацијата Sky ECC е 2.200 евра.

„Неколкупати во минатото е споменувана оваа апликација или платформа, која што се вели дека ја користат криминалците. Имаше и случај пред неколку години, кога ФБИ прекина неколку криминални групи преку лажна мобилна апликација за електронска т.е безбедна комуникација, наречена Анон“, посочуваат експерти за сајбер безбедност за ДВ. 

Како се користи?

Технологијата зад создавањето и користењето на апликацијата Sky ECC не е нелегална, но се користи за секакви нелегални активности. Причината за тоа е што ако мрежата не е достапна, пораката се чува на серверите на апликацијата Sky до 48 часа, а потоа се брише.

За да се инсталира на мобилен телефон потребно е да се има лиценца. При инсталацијата веднаш се оневозможуваат камерата, микрофонот и GPS. Пораките се бришат за 30 секунди. Апликацијата има и итно копче, со чие притискање веднаш се бришат сите пораки. 

Креаторите на апликацијата дизајнирале и лажни лозинки. Тие се користат кога некој го принудува корисникот да ја отклучи апликацијата. По внесувањето на тој код, апликацијата и сите податоци на неа автоматски се бришат. Во овој случај, компанијата е известена дека уредот е компромитиран.

Највеќе корисници во Белгија и Холандија

Во текот на 2022 година беше обелоденето дека полицајци, високи членови на нарко-картели, инспектори, осомничени за организирање проституција, трговија со оружје, па дури и судија ја користеле апликацијата Скај во Босна и Херцеговина .

Во текот на 2021 година, холандската и белгиската полиција први спроведоа акции против корисниците и добавувачите на апликацијата Скај. За време на рациите во Холандија, серверите на Sky ECC беа уништени и повеќе од 30 лица беа уапсени на 75 локации.

На 11 локации во Белгија се уапсени 200 осомничени. Меѓу нив имало и адвокати.Во рациите во двете земји запленети се 1,2 милиони евра готовина, дијаманти, накит, луксузни возила и оружје.

Претпоставките се дека во светот има околу 171.000 Sky ECC телефони во употреба; главно во Европа, Северна Америка, некои земји од Централна и Латинска Америка (главно Колумбија) и на Блискиот Исток. Секој месец, околу 70.000 од овие телефони активно комуницираат на Sky мрежата на ECC. Околу четвртина од активните корисници се во Белгија и Холандија.