Вонредна состојба во Курск, масакр во супермаркет во Украина

Бројот на загинати во рускиот напад врз супермаркет во украинскиот град Константиновка во областа Доњецк се зголеми на 11, а најмалку 35 лица се ранети. 

Пред тоа шефот на Министерството за внатрешни работи на Украина, Игор Клименко, објави на Телеграм: „Пожарот во трговскиот центар со површина од 1.000 метри квадратни е изгаснат. Оперативните служби работат на лице место“.

Сочувство од Зеленски

Во рускиот напад оштетени се станбени згради, продавници и десетици автомобили.
Претседателот Володимир Зеленски претходно на мрежата Х објави дека четири лица загинале, а 24 се ранети, а други луѓе сѐ уште се наоѓаат под урнатините.
„Оперцијата за спасување е во тек и ќе се направи сѐ за да се спасат“, рече Зеленски. 

Во меѓувреме, Русија денеска прогласи вонредна состојба во областа Курск, каде веќе четири дена траат судирите со украинските војници. 

Русија испрати засилувања во Курск

Министерството за вонредни состојби ја соопшти одлуката по седницата на владината комисија за превенција и отстранување на вонредни ситуации.

„Во разговорот беше опфатена ситуацијата во областа Курск поради нападот на украинските вооружени сили. Во регионот е воспоставено федерално ниво на одговор“, се вели во соопштението.
Во текот на ноќта во понеделникот кон вторник, Украина го засили гранатирањето во областа Курск. По артилерискиот бараж следеше упад на украинската пешадија, поддржана од тенкови и оклопни возила, во близина на градот Суџа.

Руското Министерство за одбрана во вторникот соопшти дека 300 украински војници, 11 тенкови и 20 оклопни возила ја преминале руската граница, но во средата началникот на рускиот Генералштаб, Валериј Герасимов, тврдеше дека околу 1.000 украински војници биле вклучени во битката.