Путин на самит во Кина: Апсење е исклучено

Рускиот претседател Владимир Путин денеска пристигна во Пекинг каде ќе се сретне со неговиот кинески колега Ши Џинпинг, во посета која, како што соопшти Кремљ, ќе ја покаже длабоката меѓусебна доверба и партнерството без граници меѓу Кина и Русија. Путин и неговата придружба утрината слетаа на меѓународниот аеродром во Пекинг.

Рускиот претседател малку патуваше во странство откако Меѓународниот кривичен суд (МКС) во Хаг издаде ммеѓународен налог за негово апсење во март, под обвинение за незаконско депортирање деца од Украина. Путин го посети Киргистан на почетокот на месецот. Наредбата на МКС обврзува 123 земји-членки да го уапсат Путин и да го префрлат во Хаг на судење доколку влезе на нивна територија. Ниту Киргистан ниту Кина не се членови на Трибуналот за воени злосторства.

Кремљ соопшти дека Путин ќе се сретне со Ши во Пекинг на 18 октомври на маргините на третиот форум за меѓународна соработка „Појас и пат“. Русија, која е под тешки западни санкции поради инвазијата врз Украина, веќе неколку месеци се обидува да ги зајакне економските, воените и енергетските врски со Пекинг.

Ши последен пат се сретна со својот „драг пријател“ во Москва во март годинава само неколку дена по издавањето на налогот. Тогаш Ши го покани Путин на форумот „Појас и пат“, меѓународен форум со кој претседава кинескиот лидер. Путин ќе се сретне со Си во среда.

Пекинг ги отфрли критиките на Западот за неговото партнерство со Москва, инсистирајќи дека нивните врски не ги прекршуваат меѓународните норми, а Кина има право да соработува со која било земја.

Путин последен пат ја посети Кина за време на Зимските олимписки игри во февруари 2022 година во Пекинг, кога Русија и Кина соопштија дека нивното партнерство „нема граници“, неколку дена пред рускиот претседател да испрати десетици илјади војници во Украина.