Путин ѝ се заблагодарува на Северна Кореја за поддршката

Рускиот претседател Владимир Путин пред посетата на Северна Кореја му се заблагодари на Пјонгјанг за поддршката на руската офанзива во Украина. „Многу цениме што Демократска Народна Република Кореја (Северна Кореја) решително ја поддржува специјалната воена операција во Украина“, напиша Путин денеска (18.06) во авторски текст објавен од севернокорејската државна новинска агенција КЦНА и весникот „Родонг Синмун“.

Патувањето „ќе ја подигне билатералната соработка на повисоко ниво“ и ќе придонесе за „развој на заемна и рамноправна соработка“ меѓу Русија и Северна Кореја, напиша Путин. Двете земји се во процес на „активно развивање на повеќестраното партнерство“. Во текстот, лидерот на Кремљ ја фали Северна Кореја за одбрана на нејзините интереси „и покрај деценискиот економски притисок, провокации, уцени и воени закани од САД“. Тој исто така нагласува дека Москва и Пјонгјанг ја задржале својата „заедничка линија и заедничка позиција“ во ОН.

Путин, според информациите од Кремљ, во Северна Кореја треба да пристигне вечерва. Тоа е втора посета на Путин на таа земја во неговиот мандат како претседател на Русија. Во 2000 година Путин се сретна со таткото на Ким Јонг Ун, Ким Јонг Ил.

Изолираната Северна Кореја ретко има дипломатски посети. Пјонгјанг е обвинет дека ја поддржува Русија во нејзината воена офанзива во Украина со испорака на оружје. Путин во моментов се обидува да добие дополнителна муниција. Според Кремљ, посетата на рускиот претседател доаѓа на покана на севернокорејскиот лидер Ким. За време на посетата на Путин се очекува да бидат потпишани неколку „важни документи“, вклучително и можен договор за „стратешко партнерство“, објавија руските новински агенции, повикувајќи се на извор во Кремљ.