Пронајдена е загубената радиоактивна капсула во Австралија

Пронајдена е малата, високо радиоактивна капсула која бешезагубена во австралиската сојузна држава Западна Австралија. Според регионалната влада, капсулата која му припаѓа на рударскиот гигант Рио Тинто била пронајдена две недели по исчезнувањето за време на транспорт. „Навистина е пронајдена игла во сено и мислам дека граѓаните на Западна Ацвстралија ноќва ќе спијат подобро“, рече регионалниот министер за заштита од катастрофи, Стивен Досон.

Капсулата со големина од 8x6 милиметри исчезна во периодот помеѓу 12 и 14 јануари при транспорт од рудник за железна руда во близина на градот Њуман до Перт. Дека е загубена беше утврдено дури при истовар на камионот, неколку дена подоцна.

Високо радиоактивен цезиум-137

Здравствените власти веднаш потоа го предупредија населението да не се приближува до капсулата на растојание помало од пет метри, затоа што таа содржела толку многу високо радиоактивен цезиум-137 што престојот во радиус од еден метар би имал ефект врз човечкото тело како „десет рентген зрачења на час" и би можел да предизвика акутна радијациона болест. Во потрагата по капсулата, која не е голема ниту колку паричка од 1 цент, властите користеа детектори за зрачење поставени на возила, кои можат да забележат зголемено зрачење во радиус од 20 метри.

Рударската компанија се извинува

Рио Тинто јавно се извини поради губењето на капсулата. Менаџерот Сајмон Трот рече дека му е жал поради вознемиреноста што инцидентот ја предизвика меѓу луѓето во Западна Австралија. Компанијата започна сопствена истрага за да открие како точно капсулата можела да исчезне.