Скопје меѓу најевтините европски престолнини за одмор

Приштина, Скопје, Сараево и Кишињев се рангирани како најевтини европски престолнини за годишен одмор. Истражувањето, спроведено од Vatican Tours and Tickets, ги рангираше градовите врз основа на вкупните трошоци за одмор по лице – поделени според просечните дневни трошоци, цените на хотелите и просечните патни трошоци. 

Хотели и храна по достапни цени 

Во Приштина, главниот град на Косово, дневните трошоци за посетителите во просек се 29 евра, а просечната цена на хотел за 5 ноќевања во градот е 134 евра по лице; што го прави најевтината дестинација за одмор. Вкупниот трошок за одмор по лице во Приштина е 643 евра. 

Скопје, главниот град на Северна Македонија, е на второто место на листата со вкупни трошоци од 660 евра по лице за шестдневен одмор. „Градот нуди мешавина од античка историја и модерен урбан живот, со дневна потрошувачка во просек од 30 евра. Цените на хотелите во Скопје се многу достапни, со просечна цена од 117 евра по лице за пет ноќевања. Во комбинација со просечните патни трошоци од околу 177 евра, Скопје е примамлива дестинација за патниците кои сакаат да ја искусат историјата и културата на Југоисточна Европа без да го надминат нивниот буџет“, наведува порталот.

„Приштина и Скопје не се само евтини опции - тие се порти за разбирање на различните култури на Балканот. Овие градови им нудат на патниците пристап до автентични искуства, од истражување на вековната архитектура до локалните традиции, сето тоа по мал дел од цената на попопуларните дестинации“, вели Магдалена Петрушиќ , експерт за патувања од Vatican Tours and Tickets. 

Автентични искуства 

Сараево, главниот град на Босна и Херцеговина, е на третото место, со вкупен трошок за одмор од 747 евра по лице. Со дневни трошоци во просек од 32 евра, Сараево нуди уникатен спој на култури и историја. Кишињев, главниот град на Молдавија, е на четвртото место со вкупни трошоци за одмор од 750 евра по лице. Дневната стапка на трошење на градот е 35 евра, што им овозможува на патниците да ги истражуваат неговите зелени паркови, архитектурата од советската ера и растечката винска култура. 

Подгорица, главниот град на Црна Гора, е на петтото место на листата со вкупен трошок за одмор од 760 евра по лице за шестдневно патување. Дневната стапка на трошење на градот во просек изнесува 39 евра, што изнесува 236 евра за целиот престој. Белград, главниот град на Србија, е на шестото место со вкупен трошок за одмор од 798 евра, а потоа следи Будимпешта, Унгарија со 826 евра на седмото место. Овие главни градови, иако малку поскапи од првите пет, сепак нудат буџетски опции за патниците, со свои уникатни културни и историски атракции.

Варшава, Полска, со 829 евра и Софија, Бугарија со 831 евро се на осмото и деветтото место. И двата главни града се познати по својата богата историја и енергичните културни сцени. Иако се поскапи во споредба со најдобро рангираните градови, тие сепак обезбедуваат одлична вредност за оние кои сакаат да ја истражуваат Источна Европа без прекумерно трошење. Братислава, главниот град на Словачка, е на десеттото место со вкупен трошок за одмор од 850 евра по лице за шестдневен престој. 

Приштина и Ниш поевтини од Скопје

Според листата изработена врз основа на „Индекс на трошоци на живот“ за 2024 година, којашто го изготвува Нумбео, Пришина и Ниш се поевтини од Скопје, коешто е на 131 место. Според листата за нијанса поскап е животот во Сараево, Бања Лука, Подгорица, Белград и Софија коишто се рангирани од 127 до 108 место. 

Проценетите месечни трошоци за четиричлено семејство во Скопје се 117.333 денари без кирија. Проценетите месечни трошоци за едно лице се 34.160 денари без кирија. Скопје е за 65,3% поевтино од Њујорк (без кирија). Киријата во Скопје е во просек за 92,4% пониска отколку во Њујорк.