Претседателот ги потпиша указите за законите за коридорите
29 мај 2023
Претседателот Стево Пендаровски на прес-конференција информираше дека ќе стави потпис на пакетот законски изменисо коишто ќе се овозможи забрзана изградба на коридорите 8 и 10д, без оспорената одредба за 60 часовна работна недела.
Претседателот изминативе месеци даде неколку јавни изјави дека нема да потпише указ за прогласување на закон кој содржи одредба што претходно е оспорена од Уставниот суд. „Новиот текст на законот не ја содржи формулацијата '60 часовна работна недела', дециден е Пендаровски, кој на 26 мај ги примил петте закони за изменување и дополнување на постојни закони. Тие се однесуваат на изградбата на коридорите 8 и 10д, за чија цел државата склучи стратешки договор со американско – турскиот конзорциум „Бехтел и Енка“.
Поларизација во општеството
Законите кои што беа усвоени со пропишано мнозинство во Собранието, а чии што укази за прогласување стигнаа до претседателот се Законот за изменување и дополнување на законот за работни односи, за експропријација, за законот за градење, за урбанистичко планирање и за утврдување на јавен интерес и номинирање на стратешки партнер за имплементација на проектот за изградба на коридорите 8 и 10д.
„Изминатите недели во јавноста се разви легитимна дебата во однос на содржината на овие закони, а за еден од нив и за неговата уставност имајќи ја предвид одлуката на Уставниот суд од минатата година. Неспорејќи го легитимното право за сеопфатна дебата за секој закон, вклучително и овие, сакам да укажам дека дебатата од мал број на субјекти беше употребена за зголемување на и онака високата поларизација во нашето општество што го отргна фокусот од вистинските прашања поврзани со овие закони. Место дискусијата да се насочи конпридобивките и можните ризици во однос на проектот, јавната дебата се претвори во расправа за нашите стратешки евроатлански ориентации и аспирации“, рече Пендаровски.
Оценка на уставноста
Сепак, имајќи ги предвид приговорите на дел од синдикатите, дел од граѓанските здруженија кои работат во оваа сфера, како и на некои политички партии, Пендаровски укажа дека секоја заинтересирана страна има право да поднесе иницијатива за оценка на уставноста на секој закон.
„Уставниот суд е единствената институција во нашиот правен поредок која го дава последниот збор во однос на уставноста на законите. Уставниот суд има на располагање и механизми со кои може брзо и ефикасно да донесе соодветна одлука, ако така сметаат судиите на Уставниот суд“, вели тој.