Вјоса Османи во Скопје: Поддршка за европскиот пат

Северна Македонија и Косово ќе продолжат да чекорат рамо до рамо по европскиот пат. Ова е пораката која што ја испратија во Скопје претседателот Стево Пендаровски и неговата колешка од Косово, Вјоса Османи - Садриу која што е во посета на земјата. Пендаровски порача дека земјата ги поддржува евро-атлантските аспирации на Косово и дека е подготвена да ги сподели македонските искуства во однос на реформските процеси.

Посетата на Вјоса Османи се реализира по една и пол година од посетата на Пендаровски на Косово. Ова е нивна четврта средба во последниве неколку години. 

Заедничка иднина

Двајцата соговорници се согласиле дека заедничката иднина на двете држави во евро-атлантските структури е влог во натамошна стабилизација и просперитет на регионот на Западниот Балкан.

„Северна Македонија е подготвена да ги сподели своите искуства во однос на реформските процеси, како на патот кон Европската Унија, така и во однос на членството во НАТО. Ја поддржуваме одлуката на Европската Унија за визна либерализација за Косово и активно го поддржуваме учеството на Косово во различните регионални и континентални формати на соработка“, порача Пендаровски на заедничката прес-конференција со претседателката на Косово.

Вјоса Османи-Садриу оцени дека двете земји ќе го продолжат продлабочувањето на односите во многу области од образованието и културата до здравството и економијата, надворешната политика и одбраната. „Нема поле каде што не сме работеле и каде што нема да работиме, бидејќи она што не обединува се вредностите и визијата“, додаде таа.

На средбата двајцата претседатели размениле мислења и за билатералните односи, за состојбите во двете земји, за економската соработка, како и за регионалните прашања и европските интеграции, кои се одвиваат под притисок на негативните ефекти од руската инвазија врз Украина. На средбата со косовската претседателка е разговарано и за можностите за унапредување на правата на Македонците во Косово, „во време кога некои странски пропаганди се повторно активирани“.