Мртви и ранети во црква на Јеховини сведоци во Хамбург

Во текот на манифестација на Јеховини сведоци во Хамбург со истрели се убиени или ранети повеќе луѓе. Инцидентот се случил околу 21 часот. Полицијата во Хамбург на својата интернет страница денеска (10.03) објави дека се убиени осум лица и повеќемина се повредени, а репортер на германскиот јавен сервис АРД, кој е присутен на местото на настанот, претходно синоќа јави за најмалку шест мртви и осум ранети лица. „Првичните сознанија упатуваат на тоа дека има повеќе мртви“, изјави полициски портпарол синоќа.  

Полицијата смета дека станува збор за масакр

Од безбедносни извори се дознава дека делото се смета за масовно убиство, сите загинати имаат прострелни рани. Позадината на истрелите кои одекнале во квартот Алстердорф е нејасна. За разлика од првичните укажувања, полицијата смета дека не пости извршител во бегство, се претпоставува дека можниот убиец се наоѓа меѓу мртвите во црквата.

Полицијата: Извршителот е веројатно мртов

Многу кратко по примениот повик за чуени истрели, специјална единица на полцијата во Хамбург, УСЕ, влегла во објектот. Полицајците наишле на мртви и ранети, а потоа чуле истрел од горниот дел на објектот, каде е пронајден уште еден човек, за кој се претпоставува дека е убиецот или еден од убијците, изјави полицискиот портпарол, но со ограда – апсолутна сигурност нема, иако ситуацијата во меѓувреме е смирена.

Повлечено е првично издаденото предупредување до населението за постоење непосредна опасност, меѓутоа полицијата продолжува да врши потрага по евентуални други извршители.

„За да можеме да исклучиме постоење на натамошни напаѓачи, вршиме проверки и опсежна потрага“, напиша полицијата на Твитер.

Сосетка сведочи за „четири интервали пукање“

Една сосетка сведочеше за повеќе истрели во време на одржувањето на манифестацијата на Јеховините сведоци. „Имаше отприлика четири интервали во пукањето, во секој од нив се слушаа  повеќе истрели, во временска разлика од отприлика 20 секунди до една минута. Јас потоа застанав на прозорецот и во објектот на Јеховините сведоци видов лице кое хектично трча од приземјето кон првиот кат“, изјави студентката Лара Баух.

Подоцна видела како полицајците изнесуваат луѓе на улица држејќи ги за рацете и нозете.

Големо полициско присуство

Полициски возила синоќа целосно го опколиле местото на инцидентот во голем радиус. Дополнително обезбедување вршеле полицајци вооружени со автоматско оружје. Непосредно по истрелите, сите прозорци на објектот биле осветлени, а хеликоптер кружел над зградата пред која пристигнале бројни возила за итна медицинска помош. Полицијата тврди дека се преземени сите потребни мерки, од кои најголем дел се дел од рутинската постапка, а за деталите ќе биде соопштено денеска на прес-конференција околу пладне. 

Кратко по чуените истрели, полицијата издаде официјално соопштение за постоење опасност, повикувајќи ги граѓаните да се засолнат и да избегнуваат движење во реонот каде се случи инцидентот. Околу 3 часот утрово Сојузната служба за цивилна заштита го укина предупредувањето.

Не се знае уште каков вид манифестација се одржувал во црковната заедница на Јеховини сведоци во Хамбург. На интернет страницата на Јеховини сведоци за четврток била планирана една од двете редовни неделни средби, на која според информациите била поканета и јавноста.

Градоначалникот на Хамбург, Петер Ченчер изјави дека е шокиран од настанот, изразувајќи им сочувство на роднините на загинатите и ветувајќи сеопфатна истрага.

Германскиот претседател Франк Валтер Штајнмајер на Твитер напиша дека е длабоко погоден од смртоносното насилство во Хамбург, сочувствувајќи со блиските на жртвите во нивната болка.

И претседателката на германскиот Бундестаг, Барбел Бас ја изрази својата трогнатост поради ужасното насилно дело, упатувајќи им сочувство на засегнатите и благодарност до полицијата и спасувачките тимови.