Катар: Забрана за алкохол на Светското фудбалско првенство

Алкохолот е дел од фудбалската култура во многу делови од светот. Уште пред почетокот на натпреварот, навивачите се среќаваат да испијат едно-две пива заедно. И по натпреварот, победата често се слави со алкохол или се оплакува поразот. На Светското првенство од 20 ноември до 18 декември во Катар, прв Мундијал во муслиманска земја, нема да има такви слики.

Консумирањето алкохол на јавно место е забрането во Катар. Алкохолот е достапен само за немуслиманите и само на одредени места, како што се хотелските барови. Но, за љубителите на фудбалот кои се очекуваат за време на Светското првенство во најмалата земја домаќин на Светското првенство во историјата, наводно важат помалку строги правила кога станува збор за продажба и консумирање пиво.

Секако, улога игра и фактот што голема американска пиварница е еден од главните спонзори на турнирот. На пример, ќе биде дозволено да се продава пиво на сопствениците на билети во зоните околу стадионот. Сепак, пивото не смее да се внесува на стадионот или од областа околу стадионот. Пиво ќе се служи и на официјалното собирно место на навивачите на ФИФА во паркот Ал Бида во главниот град Доха, но само во вечерните часови.

Од Организацискиот комитет на Светското првенство во Катар за ДВ изјавија: „Алкохолот не е дел од катарската култура. Сепак, гостопримството е дел од него. Затоа навивачите кои сакаат да консумираат алкохол за време на Светското првенство во Катар ќе можат да го сторат тоа“. Сепак, сликата ќе биде сосема поинаква од онаа на претходните светски првенства, кога илјадници навивачи пееја и пиеја на јавни места.

Стравувања

За навивачите кои сакаат да консумираат алкохол, ограничувањето на потрошувачката на пиво на просторот околу стадионот би можело да биде поттик да дојдат порано за да си го „поправат“ расположението, како и на претходните првенства.

Бејли Браун, претседател на Северноамериканскиот независен совет за поддржувачи, стравува дека забраната за алкохол на стадионот ќе доведе до тоа навивачите да пијат премногу пред натпреварите. „Сметам дека е вознемирувачки“, изјави Браун за ДВ. „Се плашам дека многу луѓе ќе помислат: 'Тоа се три часа во кои можам да пијам'. Тогаш се консумира многу повеќе алкохол отколку ако немаше ненадеен прекин на консумирањето алкохол“.

Марта Генс од европската организација на навивачи „Football Supporters Europe“ гледа повеќе опасности отколку придобивки во ограничувањето на потрошувачката и продажбата на алкохол. „Алкохолот е дел од фудбалската култура и тоа мора да се прифати“, изјави Португалката за ДВ. „Во реалноста, овие забрани се контрапродуктивни. Колку повеќе се обидувате да ги спроведете, толку поголем проблем стануваат“.

Во Катар не треба да се очекуваат хулигански ексцеси поврзани со алкохолот, како на некои претходни Светски првенства. Пречките за набавка на алкохол се големи. Освен тоа, само регистрираните сопственици на билети смеат да влезат во Катар за време на Светското првенство. И двете мерки би требало значително да го намалат бројот на насилни проблематични навивачи. 

Јасни правила, недостиг на транспарентност

Сепак, прашањето за алкохол може да стане проблем за навивачите во Катар. На пример, ако пијат на места каде што тоа не е дозволено. Англиската асоцијација на фудбалски поддржувачи затоа објави детален водич за навивачите за консумирање алкохол во Катар: „Не внесувајте алкохол во земјата и не пијте на улица! Во спротивно ризикувате да бидете депортирани или уапсени. Има само една продавница за алкохол во Катар и е отворена само за жителите на таа земја“.

Портпаролот на американските навивачи Бејли Браун, исто така, го критикува недостигот на „транспарентност во решавањето на проблемот со консумирањето алкохол“: „Што ќе се случи ако ве фатат со алкохол во јавност? Не сум голем љубител на сивите зони“.

На навивачите од земјите со развиена култура на консумирање алкохол, катарските организатори на Светското првенство им ставаат јасно до знаење: „Навивачите треба да имаат на ум дека консумирањето алкохол надвор од одредени области е забрането“.