Иранскиот ајатолах му се закани на Израел со „тешка казна“

Иранскиот ајатолах Али Хамнеи најави одмазда за смртта на политичкиот лидер на исламистичкиот Хамас, Исмаил Ханија во Техеран. „Злосторничкиот ционистички режим (Израел) го уби нашиот гостин во нашата куќа“, објавено е на веб-страницата на врховниот ирански лидер. Ајатолахот Хамнеи најавува: „Ќе има тешка казна“.

Претходно, исламистичкиот Хамас се закани со голема ескалација на ситуацијата поради убиството на Ханија. Убиството на Ханија во Техеран „ќе ја однесе борбата во нови димензии“ и ќе има големи последици, соопшти Хамас.

Политичкиот лидер на Хамас, Исмаил Ханија, беше убиен во напад во Техеран. Неговата смрт во посебни соопштенија ја потврдија и исламистичкиот Хамас и иранските Револуционерни гарди.

„Изутринава е нападната куќата на Исмаил Ханија во Техеран, при што загинаа тој и еден од неговите телохранители. Причината се истражува и ќе биде соопштена наскоро“, соопштија Револуционерните гарди.

Хамас соопшти дека Ханија е убиен во „предавнички ционистички напад на неговата куќа во Техеран“. Израел досега се нема изјаснето во врска со нападот.

Исмаил Ханија вчера (30.07) присуствуваше на инаугурацијата на новиот ирански претседател Масуд Пезешкијан.